Мөслим районында бер катлы йортта чыккан янгын аяусыз була: 24 октябрьдә ике бала әнисе...
Мөслим районында бер катлы йортта чыккан янгын аяусыз була: 24 октябрьдә ике бала әнисе – 40 яшьлек Гөлназ Садыйкова мәңгелеккә күзләрен йома. Кичә якыннары, мөслимлеләр аны хөрмәтләп соңгы юлга озатып, җир куенына салганнар. Гөлназ Садыйкованың бертуган сеңлесе Гүзәл Сәйфиева «Интертат» хәбәрчесе белән апасы турында иң якты истәлекләре белән бүлеште. «Шимбә көнне апа берничә тапкыр әнигә шалтыраткан. «Шалтырата – ни сөйләшергә белмибез ди, бер-ике сүз атышабыз да, бетте. Кичке якта да ашарга утырдым – берни керми, ашыйсы килми», – дип искә алды инде әни. Минем дә күңел каушабрак тора иде, әйтерсең, нидер булырга тиеш. Нәрсә икәнен аңламыйм. Мин Чаллыда идем. 12нче яртыда племянница шалтыратты: «Апа, безнең өй яна», – диде. Мин, алны-артны уйламыйча, рульга утырдым да чыгып киттем.»