Төрөөбүт тыл учууталын ураты эйгэтэ
Төрөөбүт тыл учууталын ураты эйгэтэ Саха сирин үөрэх эйгэтин үлэһиттэрин үгэс буолбут атырдьах ыйынааҕы Сүбэ мунньаҕа сылын ахсын саҥа үөрэх дьылын иннинэ Дьокуускай куоракка тэриллэр. Тэрээһин доруобуйаҕа, чөл турукка уонна үөрэх эйгэтин аныгы соруктарыгар анаммыта, 100-тэн тахса араас түмсүүлээх бырагырааманан атырдьах ыйын 19–23 күннэригэр буолан ааста. Үөрэх үлэһиттэрин атырдьах ыйынааҕы Сүбэ мунньаҕын чэрчитинэн саха тылын уонна литературатын, култууратын учууталларыгар аналлаах төрөөбүт тыл учуутала ураты эйгэни тэрийиитин туһунан өрөспүүбүлүкэтээҕи сэминээр ыытылынна. Сэминээргэ Ньурба, Үөһээ Бүлүү, Мэҥэ Хаҥалас, Таатта, Амма, Уус Алдан, Кэбээйи, Томпо, Өймөкөөн, Муома, Нам, Үөһээ Дьааҥы, Чурапчы, Орто Халыма, Хаҥалас улуустарыттан уонна Дьокуускай куораттан барыта 67 киһи кыттыыны ылла. Ыытыллыбыт сэминээр уратыта – СӨ Ил Дарханын 2891- №-дээх ыйааҕынан (06.06.2023с.) төрөөбүт тылы үөрэтиигэ уонна сайыннарыыга анаммыт, тус кылааттарын, чинчийиилэрин, таһаарыылаах үлэлэрин сыаналыырга, өйөбүл буоларга Тамара Ивановна Петрова аатынан бириэмийэни араас сылларга ылбыт учууталлар үлэлэрин сырдаттылар, үөрэтии-иитии ис хоһоонугар ураты көрүүлэрин билиһиннэрдилэр. Сэминээргэ тус уопуттарын кэпсээтилэр: Учуутал уонна уһуйааччы (педагог) сылыгар, 2023 сыллаахха Тамара Ивановна Петрова аатынан Ил Дархан бириэмийэтин бастакынан ылбыт Д.П.Коркин аатынан өрөспүүбүлүкэтээҕи Чурапчы успуорт оскуолатын саха тылын уонна литературатын учуутала Токуотун Тимирдьийэ Күптүүн (2023сыллаахха бириэмийэни Кузьмина Акулина Николаевна диэн аатынан ылбыта), Дьиэ кэргэн уонна Оҕо саас сылыгар, С.Н.Донской-2 аатынан Үөрэҕи сайыннарар уона идэ таһымын институтун 85-с сыллаах үбүлүөйүн бэлиэтиир үөрүүлээх тэрээһинигэр, 2024 сыллаахха бу бириэмийэни Попова Мария Матвеевна, Дьокуускай куорат 17-с №-дээх орто оскуолатын саха тылын уонна литературатын учуутала, онтон 2025 сыллаахха Улуу Кыайыы 80 сылын, Арассыыйаҕа Аҕа дойдуну көмүскээччилэр, Саха сиригэр Ийэ дойдуну көмүскээччи сылларыгар Т.И.Петрова аатынан бириэмийэни В.Н.Оконешников аатынан Павловскай орто оскуолатын Мэҥэ Хаҥалас улууһугар өр сылларга үлэлээбит саха тылын уонна литературатын учуутала, билигин педагог-библиотекарынан таһаарыылаахтык үлэлии сылдьар Петрова Лилия Дмитриевна. Хас биирдии кыттааччы дьарык кэмигэр, кылаас таһынан үлэҕэ, иитиигэ-үөрэтиигэ чопчуламмыт үлэлэрин уопутун атастастылар. Өрөспүүбүлүкэ үөрэҕин систиэмэтин сайыннарыыга аныгы кэм ыҥырыыларын ырытыстылар, көдьүүстээх ньымалары, сатабыллары көрдөрдүлэр. Биир идэлээхтэрин кытта алтыһан, санаа атастаһан, сэминээри истибит хас биирдии кыттааччы тус үлэтигэр сонун сүүрээн киллэрэргэ элбэҕи билэн-көрөн оскуолаларыгар баран кэпсииргэ илии тутуурдаах, өттүк харалаах баран тэрээһини сырдатыахтара. Подписаться на нас в МАХ