Л.Н. Харитонов төрөөбүтэ 125 сылыгар аналлаах өрөспүүбүлүкэтээҕи форум
Л.Н. Харитонов төрөөбүтэ 125 сылыгар аналлаах өрөспүүбүлүкэтээҕи форум Бу дьыл балаҕан ыйын 4 күнүгэр тыл билимин дуоктара, бэрэпиэссэр, лингвист, саха тылын кырамаатыкатын төрүттээччилэртэн биирдэстэрэ, Саха АССР үтүөлээх учуутала, Саха АССР наукатын үтүөлээх диэйэтэлэ Лука Никифорович Харитонов төрөөбүтэ 125 сылыгар аналлаах өрөспүүбүлүкэтээҕи форум үрдүк тэрээһиннээх ыытылынна. С.Н. Донской – II аатынан Үөрэҕи сайыннарар уонна идэ таһымын үрдэтэр үнүстүүт, Арассыыйа наукаларын академиятын Сибиирдээҕи салаатын Гуманитарнай чинчийии уонна хотугу аҕыйах ахсааннаах омуктар кыһалҕаларын үнүстүүтэ, СӨ билимин академиятын Төрөөбүт тылларын үөрэтэр, харыстыыр уонна сайыннарар киин, «Горнай улууһа» МТ, Горнай улууһун Үөрэҕин салалтата, «Одуну нэһилиэгэ» тыа сирин түөлбэтэ, Л.Н. Харитонов аатынан Маҕарас орто оскуолата форум сүрүн тэрийээччиллэрин буоллулар. Тэрээһин үөрүүлээх арыллыытыгар СӨ Ил Дарханын уонна Бырабыыталыстыбатын дьаһалтатын Тыл сайдыытын боппуруостарын сүрүннүүр управлениетын салайааччыта, тыл билимин кандидата Римма Жиркова, СӨ култууратын миниистирэ Афанасий Ноев, тыл билимин доктора Николай Ефремов, ХИФУ Хотугулуу-Илиҥҥи омуктар тылларын уонна култуураларын институтун дириэктэрэ Гаврил Торотоев, Лука Харитонов хаан уруу-аймаҕа суруйааччы Степан Сивцев—Хамалҕа эҕэрдэ тылларын эттилэр, Л.Н. Харитонов наука эйгэтигэр кылаатын ахтан аастылар. Форумҥа саха тылын сарсыҥҥытын, кэскилин түстэһэр учууталлар, иитээччилэр, эбии үөрэхтээһин педагогтара, салайааччылар, тыл үөрэхтээхтэрэ муһуннулар. Бу түһүлгэҕэ маастар-кылаастар, быыстапкалар, үс хайысханан былаһааккалар дириҥ ис хоһоонноохтук, таһаарыылаахтык, олус көхтөөхтүк үлэлээтилэр. Хас биирдии кыттааччы үөрэтии-иитии эйгэтигэр ураты буочарын, туттар албаһын, ньыматын, сатабылын дьарыгар хайдах быһыылаахтык киллэрэн туттарын туһунан иһитиннэрдэ. С.Н. Донской-II аатынан Үөрэҕи сайыннарар уонна идэ таһымын үрдэтэр институттан Ядрихинская Ф.В, Спиридонова Е.А учууталларын былаһааккаларын, төгүрүк остуол кэпсэтиитин иилээн-саҕалаан ыыттылар. Учууталлар былаһааккаларыгар барыта 53 кыттааччы, 30 бырайыак көмүскэннэ. Хас биирдии учуутал уопутун кэпсээн, тус үлэтин сырдатта. Бүгүҥҥү үөрэнээччини, аныгы төрөппүтү интэриэһиргэтэр сонун ньымаларын, албастарын кытта үллэһиннилэр. Тэрээһин түмүгүнэн бастыҥ үлэлээхтэр биһирэбил бириистэринэн, анал дьупулуомнарынан, уопуту тарҕатар туоһу суруктарынан наҕараадаланнылар. «Ийэ тылбыт инникитэ» тыл сайдыытыгар аналлаах төгүрүк остуолга пуорум кыттааччылара бүгүҥҥү күҥҥэ төрөөбүт тылынан иитии-үөрэтии тоҕоостоох түгэннэригэр тохтоон санааларын эттилэр, дьыссаат саастаах оҕону иитиигэ, төрөппүт оруолун-суолтатын тоһоҕолоотулар, оскуолаҕа төрөөбүт тыл эйгэтин тэрийиигэ, тупсарарга, хаачыстыба өттүнэн үрдүк таһымҥа таһаарарга болҕомто ууран үлэ хайысхатын чопчулуурга санаа этилиннэ. Төрөөбүт тылы харыстыыр уонна сайыннарар үлэ тутаах, сүрүн хайысхаларын быһаарсан саха тыла уонна литература сайдарыгар уһулуччулаах оруолу оонньообут Л.Н. Харитонов аатын үйэтитэргэ анаммыт тэрээһин тиһиктээх үлэни ыытан, бииргэ үлэлииргэ бигэ тирэх, далаһа буолла. Подписаться на нас в МАХ