Тарих битләре ачыла: Кайбыч сезне «Кошман укулары»на чакыра! — 24 июня 2026 г. в 07:52:17.891
Тарих битләре ачыла: Кайбыч сезне «Кошман укулары»на чакыра! Кайбыч районының тарихи мохитенә күмелергә һәм рухи мирасыбызны барларга теләүчеләрне зур бәйрәмгә чакыралар! 28 июньдә иртәнге сәгать унда данлыклы Кошман авылының Сабантуй мәйданында беренче тапкыр «Кошман укулары» фәнни-гамәли конференциясе узачак. Әлеге чара очраклы рәвештә генә Кошман туфрагында оештырылмый. Элек-электән бу төбәк үзенең мәшһүр сөннәтче бабалары белән дан казанган. Алар үзләренең изге сәфәрләрен Россиянең төрле төбәкләрендә генә түгел, хәтта Урта Азия һәм Казахстан якларында да зур осталык белән башкарган. Конференция нәкъ менә шушы кабатланмас сөннәтчелек тарихына һәм традицияләренә багышлана. Бу чарага килүчеләрнең барысын да корбан ашы, пылау, кайнар чәй, коймак белән сыйларга җыеналар. Сәүдә дә оештырыла. «Кошман укулары»нда һәркем катнаша ала, шуңа күрә сез дә килегез! Бу очрашу — һәркем өчен ачык. Килегез, тарихыбызны бергә өйрәник һәм рухи бердәмлекне хис итик! Көтәбез сезне!