Чурапчыбыт кэскилин түстүүр күнэ: Өбүгэ ситимэ салҕанар
Чурапчыбыт кэскилин түстүүр күнэ: Өбүгэ ситимэ салҕанар Бүгүн, алтынньы 6 күнүгэр, Чурапчыбыт уйгулаах туонатыгар үөрүүлээх, дириҥ ис хоһоонноох күн үүннэ. Улууспут үөрэҕин салалтата, төрөппүт сэбиэтэ уонна Педагогика түмэлэ киэн туттар ытык киһибит, норуот педагогикатын төрүттээччи, историк, кыраайы үөрэтээччи Кирилл Кириллович Пермяков төрөөбүтэ 100 сылын көрсө, «Биир тыыҥҥа түмсэн, күүспүтүн холбуоҕуҥ» диэн улуустааҕы научнай-практическай кэмпириэнсийэни үрдүк таһымҥа тэрийэн ыыттылар. Бу күн улууспут оскуолаларыттан, уһуйааннарыттан 45 киһи, 36 айымньылаах үлэнэн кыттан, өй-санаа түһүлгэтин төрүттээтилэр. Кэмпириэнсийэ үөрүүлээх арыллыытыгар, ытык киһибит олоҕун суолун дириҥник арыйан, кини аатынан педагогическай музей үтүө үлэһитэ Екатерина Иннокентьевна Егорова билиһиннэрдэ. Чурапчы улууһун үөрэҕин салалтатын начальнигын солбуйааччы Алена Борисовна Моисеева тэрээһин кыттыылаахтарын эҕэрдэлээн туран, кэмпириэнсийэ түмүктэринэн сборник бэчээттэнэн тахсыаҕа диэн эрэннэрдэ. Үөрэх — бу кэскил, сайдыы, инникигэ хардыы. Оттон инникибит — оҕолорбутугар. Ол туоһутунан, Семен Андреевич Новгородов аатынан орто оскуола уолаттара, Игнатьева Галина Николаевна уонна Попова Лилия Егоровна салалталарынан, «Биир тыыҥҥа түмсэн, күүспүтүн холбуоҕуҥ» диэн дьүһүйүүнү бэлэхтээтилэр. Кинилэр тыллара-өстөрө, туттан-хаптан тахсыылара — Чурапчы инники кэскилин түстүүр күүс буолла. Кэмпириэнсийэ сыала-соруга: оҕону иитиигэ норуот муудараһын, өбүгэлэрбит үтүө үгэстэрин аныгы олоххо киллэрии, уопут атастаһыыта. Бу соругу олоххо киллэрэн, дьүүллүүр сүбэҕэ үтүө-мааны дьоммут үлэлээтилэр: - Хоютанова Екатерина Романовна, Чурапчы улууһун үөрэҕин салалтатын сүрүн специалиһэ, бэрэссэдээтэл, - Макарова Анна Николаевна — "Туллукчаан" уһуйаан педагога. - Чечебутова Кыыдана Дмитриевна, улуустааҕы педагогическай түмэл үлэһитэ. - Прибылых Александра Захаровна, педагогическай үлэ бэтэрээнэ - Гладкина Парасковья Васильевна, Чурапчы улууһун төрөппүтүн сэбиэтин бэрэссэдээтэлэ; - Дьяконов Владимир Константинович — С.А.Новгородов аатынан Чурапчы орто оскуолатын история, обществознание учуутала. Түөрт хайысханан кыайыылаахтар ааттаннылар: - «Төрүччү үөрэҕэ» (Аймах дьон историята, удьуор утум) 1м — Дорофеева-Ким Туйаара Михайловна, И.М.Павлов аатынан Чурапчы орто оскуолатын төрөппүтэ; 2м — Чахов Эрсан, Ефимова Елизавета Михайловна, В.С.Соловьев-Болот Боотур аатынан Хатылы орто оскуолатын төрөппүтэ уонна үөрэнээччитэ; 3м — Лукина Евдокия Спартаковна, Батарина Елена Сергеевна, «Мичил» оҕо саада-оҕону сайыннарар киин иитээччилэрэ. - «Оҕону үлэ үөрүйэхтэригэр иитии» (Тыа сирин олоҕо-дьаһаҕа, идэҕэ туһаайыы): 1м — Платонова Анастасия Викторовна, Р.И.Константинов аатынан Амма орто оскуолатын дириэктэрин сүбэһитэ; 2м — Собакина Прасковья Михайловна, Г.П.Башарин аатынан Сылаҥ орто оскуолатын дириэктэри иитэр үлэҕэ солбуйааччы; 3м — Данилова Елена Михайловна, Д.Д.Красильников аатынан Мугудай орто оскуолатын педагог-библиотекэрэ. - «Айыы сиэрэ — айылҕаны харыстааһын» (Экология култуурата, сахалыы сиэр-туом): 1м — Петров Афанасий Спиридонович, Р.И.Константинов аатынан Амма орто оскуолатын төрөппүтэ; 2м — Сандаара, Анна Алексеевна Павлуцкайдар, В.С.Соловьев-Болот Боотур аатынан Хатылы орто оскуолата үөрэнээччитэ уонна төрөппүтэ; 3м — Александрова Мария Владимировна, Одьулууннааҕы «Күнчээн» оҕо сайдар киинин сүрүннүүр иитээччитэ. - «Норуот педагогиката — оҕону иитиигэ» (Өбүгэ үөрэҕин аныгы кэмҥэ туттуу): 1м — С.А.Новгородов аатынан Чурапчы орто оскуолатын саха тылын уонна литературатын учууталларын методическай холбоһуга; 2м — Филиппова Анна Тарасовна, Хатылы «Ньургуһун» уһуйаанын иитээччитэ; 3м — Чичигинарова Айталина Николаевна, В.С.Соловьев-Болот Боотур аатынан Хатылы орто оскуолатын алын кылааһын учуутала. Ытык киһибит Кирилл Кириллович Пермяков сырдык аатыгар сүгүрүйэн туран, кини олоҕун, үлэтин үөрэтиигэ, чинчийиигэ өссө күүскэ, айымньылаахтык ылсарга ыҥырабыт.