*«Эрчимэн Бэргэн» уолаттар турнирдара көрөөччү биһирэбилин ылла * — 21 июня 2026 г. в 08:34:08.492
*«Эрчимэн Бэргэн» уолаттар турнирдара көрөөччү биһирэбилин ылла * 🌿🌿🌿Уолаттарга аналлаах «Эрчимэн Бэргэн» күрэхтэһии үрдүк таһымнаахтык ыытылынна. Күрэхтэһии уопсайа саха национальнай спордун 5 көрүҥүн хапта. Ол курдук, эдэр спорсменнар мас тардыһыыга, хапсаҕайга, үс төгүл үс ыстаныыга, тутум эргииргэ уонна сүүрүүгэ күөн көрүстүлэр. Турнир муҥутуур кыайыылааҕынан мас тардыһыытыгар идэтийэр Зафарджон Решетников буолла. Иккис бочуоттаах миэстэни Кутана нэһилиэгиттэн Николай Иванов ылла, оттон үһүс үрдэлгэ Күндээйэттэн Дархан Прокопьев таҕыста. Муҥутуур күүстээхтэр 50, 30 уонна 25 тыһыынча солкуобай суумалаах харчынан наҕараадаланнылар. Ону таһынан, Дархан Прокопьев көрөөччүлэр биһирэбиллэрин ылан «Норуот таптала» анал номинация уонна «Алмазэргиэнбанктан» 20 000 солкуобай суумалаах бириэмийэ хаһаайына буолла. Турнир олус тыҥааһыннаахтык ааста. Эдэр спортсменнар күүстэрэ-уохтара уонна кыайыыга дьулуурдара көрөөччүлэри сөхтөрдө, үрдүк сыанабылы, хайҕабылы ылла. Сунтар улууһун баһылыга Анатолий Григорьев ыччат кэскилигэр бигэ эрэлин биллэрдэ: «Биһиги эдэр спортсменнарбыт бүгүн үрдүк физическэй бэлэми эрэ буолбакка, саха боотурдарыгар баар дьиҥнээх эр хоһуун спортивнай көҕүн көрдөрдүлэр. Уолаттарбыт иннигэр өссө да элбэх чаҕылхай кыайыылар күүтэллэригэр, кинилэр төрөөбүт Сунтарбыт улууһун аатын өрөспүүбүлүкэ уонна бүтүн Арассыыйа таһымыгар өссө да үрдүктүк уонна дорҕоонноохтук ааттатыахтара диэн бигэ эрэллээхпин!» _Сунтаар улууһун дьаһалтатын пресс-сулууспата_