Ытыктабыллаах Сунтаар улууһун олохтоохторо, ыраахтан-чугастан ааттаан-суоллаан кэлбит к... — 19 июня 2026 г. в 23:46:37.916
Ытыктабыллаах Сунтаар улууһун олохтоохторо, ыраахтан-чугастан ааттаан-суоллаан кэлбит күндү ыалдьыттарбыт! Бүгүн биһиги улууспутугар ураты, өрөгөйдөөх түгэн үүннэ! Олоҥхо дойдута – Сунтаар улууһа сурукка киирбитэ 225 сылын көрсөр үбүлүөйдээх сылга саха норуотун ытык бырааһынньыгын – Үрүҥ Тунах Ыһыаҕын – үрдүк таһымҥа ыһаары, үөрэн-көтөн өрө көтөҕүллэн муһуннубут. Бу ыһыах ураты суолталаах, Арассыыйаҕа биллэриллибит Сомоҕолоһуу сылын, Саха Өрөспүүбүлүкэтигэр Култуура сылын уонна биһиги Сунтаарбыт улууһугар Номох уонна сайдыы сылларын чэрчитинэн ыытыллар. Бу барыта биир сомоҕо буолан, нэһилиэкпит, улууспут, өрөспүүбүлүкэбит инники кэскилин туһугар күүскэ үлэлиирбит бэлиэтэ. Быйыл Сунтаарбыт 225 сыллаах историятын кэрэһилиир, былыргы номохторун уонна үйэлэргэ умнуллубат устуоруйатын үөрүү-көтүү аргыстаах ахтар, өрө тутар кэммит кэллэ. Биһиги улуус дьоно-сэргэтэ өбүгэлэрбит үгэстэрин ытыктаан, култуурабытын харыстаан, саҥа көлүөнэҕэ тиэрдэн, сахабыт тылын, өйүн-санаатын салгыы сайыннарар аналлаахпыт. Бу Ыһыах Айыыһыттан алгыс ылан, Айылҕаҕа сүгүрүйэн, сырдык санаалары мунньан, биир дойдулаахтарбыт эйэлээх олоххо, чэгиэн турукка, үлэҕэ-хамнаска ситиһиилэниэхтэрин туһугар ананар. Ыһыах биһиги сүрэхпитигэр эрэли үөскэтэр, үлэҕэ, саҥа кыайыыларга кынаттыыр. Бу саха норуотугар улахан суолталаах күн Анал байыаннай дьайыыга Аҕа дойдуну көмүскүү сылдьар байыастарбытыгар төрөөбүт дойдуларыттан Үрүҥ Тунах Ыһыаҕынан истиҥ эҕэрдэбитин тиэрдэбит, арчылыыр, харыстыыр алгыспытын аныыбыт! Ыһыахха этиллибит алгыс кыайыыны-хотууну аҕаллын, халыҥ харысхал буоллун! Күндү биир дойдулаахтарбыт! Бары биир санаанан сомоҕолоһон, күүспүтүн-уохпутун түмэн, улууспут сайдыытыгар саҥа кэрдиис кэми олохтуоҕуҥ! Барыгытыгар чэгиэн доруобуйаны, дьолу-соргуну, үлэҕитигэр үрдүк ситиһиилэри, эйэлээх олоҕу уонна бигэ туругу баҕарабыт! Ыһыах үрдүк таһымҥа аастын, үөрүү-көтүү аргыстастын, кэлэр кэскилбит сырдык буоллун! «Сунтаар улууһа (оройуона)» муниципальнай оройуон баһылыга А.В. Григорьев Сунтаар улууһун депутаттарын Сэбиэтин бэрэссэдээтэлэ У.Д. Попова