Убаастабыллаах Владимир Африканович!
Убаастабыллаах Владимир Африканович! «Сунтаар улууһа (оройуона)» муниципальнай оройуон дьаһалтатын уонна оройуон Сэбиэтин депутаттарын ааттарыттан Эйигин, РФ Үлэ Дьоруойун, СӨ тыатын хаһаайыстыбатын үтүөлээх үлэһитин, Бочуот Знага, “Үлэ Албан аата 1, 2, 3 истиэпэннээх, Хотугу сулус уордьаннардар кавалердарын, Сунтаар улууһун, Бордон нэһилиэгин бочуоттаах олохтооҕун, күн сирин көрбүт кэрэ-бэлиэ күҥҥүнэн итиитик-истиҥник эҕэрдэлиибит! Эйигин тыа хаһаайыстыбатын сайдыытыгар үрүҥ илгэни, эмис эти дэлэтэн, уостубат уйгуну-быйаҥы уһансан, үлэттэн дьоллонон, дьон-норуот дириҥ ытыктабылын, билиниитин ылбыт чулуу үлэһиппитинэн билинэбит. Төрөөбүт улууһуҥ дьоно-сэргэтэ, Эн ситиһиилэргинэн киэн туттабыт, холобур оҥостобут. Сахабыт сирин уонна Сунтаарбыт улууһун тыатын хаһаайыстыбатын сайдыытыгар, бигэ туруктаныытыгар бэйэҥ кылааккын салгыбакка, сылайбакка киллэрэ сылдьаргын өрүү үрдүктүк сыаналыыбыт, сүһүөхтээх бэйэбит сүгүрүйэн туран дириҥ махталбытын биллэрэбит. Күндү Владимир Африканович! Бу дьоро күҥҥэ тус бэйэҕэр уонна дьиэ кэргэҥҥэр чэгиэн чэбдик доруобуйаны, уһун дьоллоох олоҕу баҕарабыт, чугас дьонуҥ сылаас сыһыана, таптала, кыһамньыта дууһаҕын угуттаан үтүөнү эрэ аҕаллын! «Сунтаар улууһа (оройуона)» муниципальнай оройуон баһылыга А.В. Григорьев Улуус дьокутааттарын Сэбиэтин бэрэссэдээтэлэ У.Д. Попова