“ТЫЛ СҮМЭТЭ” көрүү-күрэс бастакы күнэ түмүктэннэ — 19 июня 2026 г. в 06:04:24.383
“ТЫЛ СҮМЭТЭ” көрүү-күрэс бастакы күнэ түмүктэннэ Бүгүҥҥүттэн Сунтаар уйгулаах ыһыаҕар Улуу киһибит Охонооһой уола Сэргэй Сибиэрэп-Кыыл Уолун аатын үйэтитэр өрөспүүбүлүкэтээҕи “Тоҕус оһуордаах түһүлгэ” төрүттэннэ. Түһүлгэ устар ууну сомоҕолуур, уран тылы иччилиир уус-уран айымньы түһүмэҕин – “ТЫЛ СҮМЭТЭ” көрүү-күрэһи, үгэс курдук, Леонид Попов аатынан Сунтаар киин бибилэтиэкэтэ тэрийэн ыытар. Бүгүн, бэс ыйын 19 күнүгэр, оҕолор ааҕыылара саҕаланна! Оҕолорго Дьүүллүүр Сүбэҕэ Сунтаар политехническэй лиссиэйин саха тылыгар уонна литературатыгар учуутала, РФ үөрэҕириитин бочуоттаах үлэһитэ, СӨ үөрэҕириитин туйгуна, “Учууталлар учууталлара”, “Идэҕэ бэриниилээх буолуу” бэлиэлэр туһааннаахтара Мария Васильевна Кондратьева (бэрэссэдээтэл), Л. Попов аатынан киин бибилэтиэкэ ааҕааччыны кытта үлэлиир салаа бибилэтиэкэрэ, СӨ култууратын туйгуна, “СӨ култууратын сайдыытыгар кылаатын иһин” бэлиэ хаһаайката Раиса Ивановна Павлова, оҕо бибилэтиэкэтин кылаабынай бибилэтиэкэрэ, СӨ култууратын туйгуна Марфа Егоровна Спирова үлэлээтилэр. "Тыл сүмэтин" түһүлгэтигэр уһуйааччы, Олоҥхо тыйаатырын үлэһитэ, иккис "Тыл сүмэтин" кылаан кыайыылааҕа Никандр Прокопьевич Тимофеев күндү ыалдьыт буолан тиийэн кэлэн, оҕолору көрөн-истэн барбыта үөрүүлээх. Уран тыл түһүлгэтин Тойбохойтон 9 саастаах Дима Васильев Күн Дьирибинэ "Сахсырҕалаах таракаан" үгэтин олус сэргэхтик ааҕан, бэрткэ арыйда (сал. Д. В. Кириллина, Л. П. Прокопьева). Аҕыйах хонуктааҕыта кини Аллыҥа ыһыаҕар оһуокайга кыттан, бастыҥ буолан, эрдэттэн сыал-сорук туруорунан тарбыйах ылардыы оҥостон кэлэн, тарбыйах бириистээх үөрэн-көтөн барбыта. "Ыалдьа сылдьабын, сарсыарда 38 кыраадыс температуралаах этим, ол иһин сэниэтэ суохтук аахтым», - диир Дима. Кинини куруук аҕата Айаал Петрович арыаллыы, өйүү сылдьара олус хайҕаллаах. Эмиэ аҕатыгар бүөбэйдэтэ сылдьар Сунтаартан 9 саастаах Нарыйа Игнатьева олохтоох ааптар Розалия Сидорова-Ымыычаана «Иһиттэр айдааннара» үгэтин олус үчүгэйдик аахта (салайааччыта Т. Н. Спиридонова). «Тыл сүмэтин» саамай элбэх кыттааччылаах "Тыл умсулҕана" бөлөх (8-10 саастаах 16 оҕо, салайааччы Т. И. Герасимова) Сунтаар суруйааччыларын хоһооннорунан "Ийэ тыл - олох төрдө" литературнай дьүһүйүүтүнэн көрөөччүлэргэ олус сөбүлэттэ. Күрэс саамай ыраахтан сылдьар кыттааччыта Дьокуускай куораттан 8 саастаах Лилиана Крылова Бүөтүр Тобуруокап уонна Аким Кондратьев хоһооннорунан "Буолар да эбит" хомуур хоһооннорун олус чобуотук ааҕан иһитиннэрдэ. Салайааччыта ийэтэ А. В. Крылова. Ити курдук, бүгүн “Тыл сүмэтэ” уран тыл түһүлгэтигэр Дьокуускайтан, Сиэйэттэн, Аллыҥаттан, Күүкэйтэн, Күндэйэттэн, Тойбохойтон, Элгээйиттэн, Сунтаартан барыта 34 оҕо кыттааччылаах 14 үгэ, хоһоон ааҕылынна. Салгыы бүгүн кыттыбатах оҕолор уонна улахан дьон сарсын, ыһыах бастакы күнүгэр, Тойон түһүлгэ эҥээр балаҕаныгар 14.00 чаастан кыттыахтара. Иһитиннэриини суруйда ааҕаччыны кытта үлэлиир салаа сүрүннүүр бибилэтиэкэрэ Марианна Поскачина