🗳Тений 18-20 сентябрьыште Кугыжаныш Думыш депутат-влакым сайлаш тӱҥалына. — 7 августа 2026 г. в 06:30:01.797
🗳Тений 18-20 сентябрьыште Кугыжаныш Думыш депутат-влакым сайлаш тӱҥалына. Тидын шотышто Мер эскерымаш штабыште прессконференций эртен. Тудым штаб вуйлатыше Евгений Кузнецов вӱден. Избиркомын еҥже Мария Микка каласкален: Марий Эл гыч 10 кандидат регистрацийым эртен. Нуно чылан тӱрлӧ партийын представительышт улыт. Шкенжым шке темлыше ик еҥ (самовыдвиженец) регистрироватлаш ситыше кидпалым поген шуктен огыл. Ты кечылаштак вич муниципалитетыште: Йошкар-Олаште, Волжск олаште, Курыкмарий, Кужэҥер да Юрино округлаште – сайлыме кампаний эрта. Чылаже 119 кандидат темлалтын. Кызытеш 62 еҥым регистрироватлыме. Политический партий деч документым 6 августышто налмым чарныме, а регистрацийлан документым 10 август марте конден шукташ лиеш. Южо вере ик верыш шуко кандидат темлалтеш. Мутлан, Йошкар-Олаште (ешартыш сайлымаш, 2 мандат) – Вашский округышто ик верыш куд кандидат, Набережный округышто – ик верыш ныл кандидат. А теве Кужэҥер округышто (15 мандат) ик верыш 6 гыч 8 кандидат марте логалеш. Юрино округышто (15 мандат) – 11 гыч 13 кандидат марте.