Ниттил маз
Ниттил маз Абадссар аьрщарай урттул маз – щурщу, Абадссар мукунма щинал маз чяр-чяр. Ттул ниттил маз тIурча – нахIусса жюржу – Гьунттийнийн бухлавгун, бат хьунтIиссар тIар. Кьавкьсса чIапIив кунма мурхьирдаяту, КьатI учинтIиссар тIар ттул ниттил махъру, Агь, на миннулъявхха гьаз увсса щяту, Мирихха ттул дакIнил мяъна ва хъару! Бусансса махъ бакъа на чунна иян? Махъяхха буттахъал кьабивтсса дакIнин. Ци миллатраясса унугу инсан, Ас бусса ухьурча, ганахь УССАЙ чин. Бивзрув-бурув кувкун, на лакку мазрай, КьалякъинтIиссарив жаваб дулунма? На ттула оьрчIахьгу, бахъ-бухъ тIий, ацIлай, КIиссурттахрав буслан, къюкIссаннахь кунма? Ниттил мазрах мякьсса ва ттул даIнива Кьамул бува, аьрщий, миннат-шикаят: Маз къакIулсса шатрал увкуну ччива, Ттула маз къакIулсса арсну ляхъаяр! На аьтIий акъара зумувсса мазрай ЧIила ритарчагу, ци байссар мукьал: Та вев учирчагу на ниттил мазрай Жаваб дулунтIиссар азгъунсса зунттал. МахIаммад-Загьид Аминов