«Дьоммут куруук көһө сылдьаллара, бэрт түргэнник хомуна охсоллоро. Онон биһиги, оҕолор,...
«Дьоммут куруук көһө сылдьаллара, бэрт түргэнник хомуна охсоллоро. Онон биһиги, оҕолор, элбэх оскуолаҕа үөрэммиппит. Үөһээ Бүлүүгэ Ю.И. Васильев-Дьаргыстай эһэтин, эбэтин аах дьиэлэригэр олоро сылдьыбыппыт. Ийэбит кулуупка “Дьулуруйар Ньургун Боотур” олоҥхону туруорбута. Онтон Тулагыга көһөн кэлбиппит, кулуупка үлэлээбитэ, ыһыах тэрийэн ыспыта. Ийэбит саха култууратын, тылын-өһүн, үгэһин, сиэрин-туомун өрө тутарара. Өймөкөөҥҥо олорор кэммитигэр аатырбыт “Күөрэгэй” айымньытын суруйбута. Ийэбит наһаа актыыбынай позициялаах этэ. Кинини дьон-сэргэ убаастыыра, сыаналыыра. Дьиэ кэргэммитигэр оҕолор, сиэннэр бары уу сахалыы саҥарарбыт. Ийэбит “дьиэ иһигэр бары сахалыы саҥарыаҕыҥ, онтон уулуссаҕа таҕыстыгыт да бэйэҕит дьыалаҕыт” диэн сиэннэригэр куруук этэрэ. Дьиэбитигэр куруук дьон тобус-толору буолара, хаһан да кимиэхэ да аккаастаабат, куруук сүбэлиир буолара», – диэн иһирэхтик кэпсээтэ. CӨ суруйааччыларын союһун чилиэнэ Гоголев Василий Иннокентьевич- Уйулҕан ийэтэ – Герой Ийэ, уон оҕолоох эбит уонна 2 оҕону эбии ииппит. Кэргэнэ эрдэ өлбүт, соҕотоҕун оҕолорун атахтарыгар туруорбут. 2013 с. ийэтин туһунан ахтыы кинигэ таһаарбыт. Ийэтэ төрөөбүтэ 100 сылыгар анаан «Хоһуун таас» кинигэни суруйбут, ол кинигэтин «Бичик» кинигэ кыһата «Хамначчыт кыыс дьылҕата» диэн ааттаан таһаарбыта. Уйулҕан ийэтигэр анаан суруйбут хоһоонугар Роман Степанов мелодия айбыт уонна ырыаһыт уолугар Константин Степанов ыллаабыт ырыатынан оҥоһуллубут килиибин бэркэ сэҥээрэн көрдүбүт. Литература-музыка салонугар айар түмсүүлэр ийэлэригэр анаан суруйбут хоһооннорун аахтылар, ырыа ыллаатылар. Ханнык баҕарар суруйааччы ийэтин туһунан анабыл хоһоонноох-ырыалаах, истиҥ иэйиилээх ахтыылардаах. Музейбытыгар “Күнү көрдөрбүт күн ийэм” диэн дьоҕус быыстапка экраҥҥа тыктарыллан уонна көрдөрүүгэ турда. Ол курдук, барыта 16 суруйааччы ийэлэрин туһунан кылгас иһитиннэриини суруйдубут, хаартыскалаан, хоһоонноон туруордубут.