Республик Вуйлатыше Юрий Зайцев Туныктыш пашаеҥ-влакын августысо конференцийышкышт ушнен. — 21 августа 2026 г. в 07:30:26.898
Республик Вуйлатыше Юрий Зайцев Туныктыш пашаеҥ-влакын августысо конференцийышкышт ушнен. Тудо Йошкар-Оласе Г.Константинов лӱмеш руш академ драме театрыште эртен. Мероприятий «Республика Марий: Образование для Созидания. Единство для будущего» форумлан тӱҥалтышым пуэн. Пайремле ужаш деч ончыч Регион вуйлатыше Республикысе Туныктыш министр Лариса Ревуцкая дене пырля иммерсив ончер дене палыме лийын. Тудо патриотический воспитанийлан пӧлеклалтын, тыгак тушто «Азбука СВО» стендым луктыныт. Каласен кодыман, туныктышо, тунемше-влак специальный военный операцийын участникше-влаклан полышым эреак пуаш тыршат: боец-влаклан кумылыштым нӧлталашлан серышым возат, окоп сортам ямдылат, кукшо душ комплектым, нашлемникым ыштат, маскировочный сетьым пидыт. Конференций Марий Элысе туныктыш системын 105 ияш лӱмгечыжлан пӧлеклалтын. Тушко 600 наре еҥ ушнен: педагог, вуйлатыше, верысе кучем, мер пашаеҥ-влак. Марий Элысе Виктер туныктыш системылан кугу тӱткышым ойыра. Тений тиде отрасльым вияҥдашлан 16 тичмашат 5 луаш млрд теҥгем ойырымо. Тиде, кодшо ий дене таҥастарымаште, 1,7 млрд-лан шукырак. «Молодежь и дети» нацпроект полшымо дене Йошкар-Олаште 2 школ чоҥалтеш. Кажныже – 1100 верлан ышталтеш. Тыгак Волжскышто школым нӧлтымо пашам тӱҥалме. «Профессионалитет» федерал проект дене 4 туныктыш-производство кластерым ыштыме. Вес ийын гын, 5-ше кластерым ышташ шонат. Юрий Зайцев вашлиймашыште туныктышо-влаклан тауштен. Кугыжаныш да ведомстве суаптарым кучыктен. «Марий Элысе образованийын сулло пашаеҥже» чап лӱм дене «Дарование» школ-интернатын туныктышыжо Наталья Любимова, Руш Шой школ туныктышо Николай Суворов палемдалтыныт.