Марий Эл Республикыште «Земский тӱвыра пашаеҥ» программыш ушнышо-влак дене регион вуйла...
Марий Эл Республикыште «Земский тӱвыра пашаеҥ» программыш ушнышо-влак дене регион вуйлатыше Юрий Зайцев вашлийын. Тиде программылан кокымшо ий. 2026 ийыште ты программыш ушнышо-влак пашам пуышо организацийышт дене ойпидышыш кидпалым пыштеныт. Тений ты программе дене келшышын, 20 тӱвыра пашаеҥ республикысе районалште пашам ышташ тӱҥалеш. Тиде Курыкмарий, Килемар, Кужэҥер, Медведево, Морко, У Торъял, Оршанка, Параньга, Шернур, Советский да Юрино район-влак. Нунылан ик миллион теҥге ойыралтеш, нуно тӱвыра тӧнежыште вич ий дечын шагал огыл пашам ыштышаш улыт. Тидын дене пырля Юрий Зайцев кодшо ийын «Земский тӱвыра пашаеҥ» программе дене пашам ышташ тӱҥалше специалист-влаклан таумутым кучыктен. Тиде Параньга йоча сымыктыш школын туныктышыжо Альмир Ихсанов, арбан тӱвыра пӧртын вуйлатышыже Екатерина Рыбакова, Шернур районысо тӱвыра да каныме рудерын художественный вуйлатышыже Наталья Чиванова, тыгак Морко йоча сымыктьыш школын туныктышыжо Наталья Япеева.