«Майатул» фестиваль-конференций мучашлалтын.
«Майатул» фестиваль-конференций мучашлалтын. Тенийысе тудын ойыртемже – кугу конференций. Ты гана финн-угор театр-влак спектакль дене огыл Йошкар-Олаш толыныт. Нунын еҥышт национальный театрын да «Майатулын» ончыкылыкшо нерген каҥашеныт. «Майатулын» историйже да В. Пектеевын усталык корныж нерген палыме лиймек, Мордва Республикын калык писательже Александр Пудин «Майатул» фестивальын финн-угор театр-влакын репертуарыштым пойдарымаште верже нерген докладым темлен. Санкт-Петербургысо профсоюз-влак университетын профессоржо, лӱмлӧ драматург Сергей Пронин таче илыш вашталтме жапыште финно-угор театр сцене могай лийшаш нерген каласкален. Фестиваль жапыште Шкетан театр «Югорно» да «Окса тул» спектакль-влакым ончыктен, тидын дене пырля В. Пектеевын «Кава пундашышке йолгорно» фильмым темленыт. Уна семын Беларусь да Абхазий гыч театр-влак шке постановкышт дене толыныт.