Морко районышто эше ик ялыш канде тулым пуртеныт.
Морко районышто эше ик ялыш канде тулым пуртеныт. Тушто 20 километр наре газ пучым чоҥеныт да Нурӱмбал ялыш канде тул толын. Тидын дене пырля верысе школымат ынде газ дене олташ тӱҥалыт. Тиде пашам республикын газоснабженийын 2026-2030 ийлан программыже дене келшышын ыштыме. Ик эн ончыч газым СВО участникын шочмо пӧртышкыжӧ пуртеныт. Тидлан участке марте газ пучым яра чоҥеныт, а шокшым пуышо да газ оборудованийым налаш регионысо субсидий ойыралтын. Таче Марий Эл социал газификаций шотышто программым шуктымо дене ончыл верыште. Кызыт 11 тӱжем утла еҥын илымверышт марте газ пучым шупшыныт, 10 тӱжем наре пӧртыш канде тул толын. Тиде паша Россий Президент Владимир Путинын темлымашыже дене илышыш пура. Изи яллаш газым пуртымо паша ик эн кӱлешан задачылан шотлалтеш. Регион вуйлатыше Юрий Зайцев возен, тиде паша ончыкыжымат шуйна.