Йошкар-Олаште социокультурный проектирований шотышто туныктымо интенсив лиеш.
Йошкар-Олаште социокультурный проектирований шотышто туныктымо интенсив лиеш. 15–16 октябрьыште Брюгге сер ӱмбалне верланыше Креатив индустрий школышто «От идеи к заявке» туныктымо интенсив лиеш. Тудо Тӱвыра инициативе-влак президент фондын грант конкурсышкыжо йодмаш-влакым налме кампанийым почмо дене кылдалтын. Интенсивыште социокультурный проект-влакын автор ден командышт, тӱвыра тӧнеж, некоммерческий ушем, усталык ушем да инициативе группо-влакын ӱшанъеҥышт участвоватлат. Программе грант конкурсышто сеҥаш полшышо проект-влакым ямдылымашлан пӧлеклалтеш. Кок кече жапыште участник-влак проблемым кычалме да тудым рашемдыме гыч ямде проект идейым ончыктымо марте корным эртат. Программыште: целевой аудиторий дене пашам ыштымаш, мероприятий-влакым проектироватлымаш, цель ден задаче-влакым рашемдымаш, бюджетым ыштымаш да моло. Поснак кугу верым практике налеш. Участник-влак креатив идейым ямдылыме да бюджетым ыштыме шотышто деловой модышлаште участвоватлат, проект шаблон-влак дене пашам ыштат, шке проектыштым ямдылат да эксперт-влак ончыко луктыт. Интенсив мучашлан участник-влак проект йодмашлан негызым ямдылат: проблемым да целевой аудиторийым рашемдат, цель ден задаче-влакым шындат, мероприятий ден бюджет планым ыштат, увер стратегийым ямдылат да проектыштым эксперт-влаклан ончыктат.