Марий Эл Кугыжаныш Погынын председатальже Михаил Васютин Марий Турек районыш миен.
Марий Эл Кугыжаныш Погынын председатальже Михаил Васютин Марий Турек районыш миен. Тушто нацпроект-влак дене шукталтме пашам аклен. Район администраций вуйлатыше Сергей Решетов да район вуйлатыше, Депутат погын председатальын пашажам жаплан шуктышо Лариса Яндыбаева дене икмыняр объектыште лийын. Икымше вер - Марий Турек школ. Тудым «Молодежь и дети» нацпроект дене тӧрленыт, тыгак тушто агрокласс пашам ышта. Таче школышто 850 йоча тунемеш, нунын дене 56 педагог пашам ышта. Тӱҥалтыш школ воктене верысе инициативылан полыш программе дене Кугу Отечественный сарын участникше - туныктышо да тунемше-влаклан памятникым тӧрленыт. Тыгак Михаил Васютин Марий йӱла пӧртыштӧ лийын. Тушто тудым онаеҥ Григорий Иванов вашлийын. Эше ик объект - В.Мосолов лӱмеш Краеведений тоштер. Фондышто марий калыкын историй, археологий, этнографий экспонат-влак аралалтыт. Кугыжаныш Погын председаталь тоштерын зданийжым аклен да ачалымаш пашам шуктымо да объектым профильный программыш пуртымо шотышто каҥашен. Тидын дене пырля Михаил Васютин Рӱдӧ паркым тӱзатыме пашам аклен. Тудым икмыняр ий ончыч «Лучшая муниципальная практика» конкурсышто сеҥымеке, ышташ йӧн лектын. Тений паркыште спорт да модмо верым, йоча площадкым тӱзатеныт. Фото: gsmari.ru