МБДОУ «Центр развития ребенка-детский сад #3 «Чебурашка» с. Сунтар
Лайфстайл · 28 мая 2026 г.
«Сунтаар күөл бэлэҕэ» испэктээк — 28 мая 2026 г. в 12:50:26.343
«Сунтаар күөл бэлэҕэ» испэктээк Ыам ыйын 28 күнүгэр Сунтаар улууһа төрүттэммитэ 225 сылыгар аналлаах С.А.Зверев-Кыыл Уола аатынан Норуот айымньытын киинигэр «Чебурашка» оҕо уһуйаанын иитиллээччилэрэ Сунтаар нэһилиэгин номоҕор олоҕуран Зинаида Федотова-Дьол Кыыма суруйбут «Сунтаар күөл бэлэҕэ» испэктээги көрдөрдүлэр. Испэктээги туруорааччы-В.Николаев аатынан Сунтаардааҕы норуот тыйаатырын режиссера Татьяна Заровняева. Бу күн Сунтаар улууһа төрүттэммитэ 225 сылыгар аналлаах иитиллээччилэр уруһуйдарын быыстапката, хаартыскаҕа түһэргэ аналлаах сахалыы фотозона тэрилиннилэр. Сунтаар нэһилиэгэ киэҥ баай историялаах. Үйэлэртэн үйэҕэ, көлүөнэттэн көлүөнэҕэ бэриллэн кэлбит норуот номоҕун кырачаан оҕолор улахан сыанаҕа көрдөрбүттэрэ көрөөччүлэр улахан биһирэбиллэрин ыллылар. Испэктээккэ иитиллээччилэр Эрсан Марков, Эрчим Федоров, Тимур Кугданов сүрүн оруолларга оонньоотулар. Дэгиттэр талааннаах Дайаана Иванова тойук туойда, Игнат Сусов оһуохай тылын эттэ. Оҕолор сахалыы ырыа ыллааннар, үҥкүүлэри үҥкүүлээннэр талааннарын көрдөрдүлэр. Ону таһынан төрөөбүт Сунтаардарын улууһун өрөгөйүн ырыатын кырачааннар өрө көтөҕүллүүлээхтик ыллаатылар. Көрөөччүлэр «Сунтаар күөл бэлэҕэ» испэктээги суруйбут Зинаида Федотованы-Дьол Кыымын дохсун ытыс тыаһынан көрүстүлэр. Кини Сунтаар номоҕор олоҕуран суруйбут испэктээгэ үүнэр көлүөнэни иитиигэ улахан суолталаах. Кэнчээри оҕолорбут төрөөбүт сирдэрин историятын, норуотун үгэстэрин билэллэригэр, үөрэтэллэригэр тирэх буолар.