МБДОУ «Центр развития ребенка-детский сад #3 «Чебурашка» с. Сунтар
Лайфстайл · 4 апреля 2026 г.
Ытыктабыллаах Сунтаар улууһун аҕалара! — 4 апреля 2026 г. в 23:45:20.686
Ытыктабыллаах Сунтаар улууһун аҕалара! "Сунтаар улууһа (оройуона)" муниципальнай оройуон дьаһалтатын, улуус депутаттарын Сэбиэтин уонна тус бэйэбит ааппытыттан Эһигини, дьиэ кэргэн дурдата-хаххата, бигэ тирэҕэ, олоҕун тутула буолар Аҕалар күннэринэн итиитик-истиҥник эҕэрдэлиибин! Аҕа диэн - дьиэ кэргэн сүрүн тирэҕэ, Аҕа дойдуну көмүскээччи. Кини күүстээх, эрэллээх, үтүө, дьоһуннаах. Аҕа бэйэтин холобурунан үтүө суобастаахтык олорорго, үлэни таптыырга, наадалаах кэмҥэ аттыгар буоларга, дойдуну таптыырга үөрэтэр. Саха киһитэ былыр былыргыттан аҕаны дьиэ кэргэн сүбэһитэ, үлэ-хамнас сүрүн тэрийээччитэ диэн үрдүктүк тутара. Бүгүн улууспут олоҕун бары хайысхаларыгар – норуот хаһаайыстыбатын араас салааларыгар, сүөһү, сылгы иитиитигэр, үөрэҕириигэ, доруобуйа харыстабылыгар, тутууга, суол оҥоруутугар уо.д. а күүстээх аҥардарбыт – аҕалар инники күөҥҥэ үлэлии-хамсыы сылдьалларыгар, улууспут экономиката сайдарыгар, дьон олоҕо тупсарыгар сыраларын-сылбаларын, билиилэрин, сатабылларын биэрэн туран үлэлииллэригэр махтанабыт! Билиҥҥи уустук кэмҥэ эр санаалаах, хорсун-хоодуот буойун аҕаларбыт Анал байыаннай дьайыыга Ийэ дойдуларын иннигэр бэриниилээхтик сулууспалыыллар, уот-буулдьа аннынан дьоруойдуу быһыыны көрдөрөллөр. Эһиги эйэлээх олох иһин туруулаһар күүстээх санааҕытыгар сүгүрүйэбит уонна эһигинэн киэн туттабыт! Аҕа үүнэр көлүөнэҕэ төрөөбүт дойдуга тапталы, тулалыыр эйгэҕэ харыстабыллаах сыһыаны иҥэрэр, эр санаалаах, дьоһун киһи, дьиэ кэргэн бигэ тирэҕэ буоларга уолаттарын иитэр-такайар. Киһилии киһи, үтүө үлэһит, ылыммыт дьыалатын ситэрэн тэйэр, эппит тылыгар турар сиэрдээх буоларга эдэр ыччакка холобур буолар. Ытыктабыллаах аҕалар! Бүгүҥҥү бырааһынньыктааҕы күҥҥэ хас биирдии аҕаҕа тулуургут, күүскүт, дьиэ кэргэҥҥитигэр бэриниигит иһин махтал тылларын тиэрдэбит. Эһиэхэ чэгиэн доруобуйаны, дьиэ кэргэҥҥитигэр дьолу-соргуну, ситиһиилээх үлэни баҕарабыт. Дьиэҕит сылааһынан эрэ илгийдин, таптал, өйдөһүү, үөрүү-көтүү эрэ аргыстастын, ил-эйэ эҥэрдэстин! Сунтаар улууһун баһылыга А.В. Григорьев. Улуустааҕы депутаттар Сэбиэттэрин бэрэссэдээтэлэ У.Д. Попова