Үгэстэри чиҥэтэн, өбүгэ муудараһын үйэтитэн: Уһуйааччы күнэ Чичигинарова Мария Ивановна... — 23 мая 2026 г. в 00:52:29.482
Үгэстэри чиҥэтэн, өбүгэ муудараһын үйэтитэн: Уһуйааччы күнэ Чичигинарова Мария Ивановна 80 сааһыгар анаан! Биһиги "Ньургуһун" уһуйааммытыгар олус дьоһуннаах уонна кэрэхсэбиллээх тэрээһин буолан ааста. Педагогическай үлэ бэтэрээнэ, уһуйааччы, Саха Республикатын үөрэҕэриитин үтүөлээх үлэһитэ, ССРС уонна РСФСР норуотун сырдатыытын туйгуна, “Учууталлар учууталлара” уонна “Саха Республикатын үөрэҕириитин систиэмэтин бочуоттаах уһуйааччыта” бэлиэлэрин хаһаайына, Чурапчы улууһун бочуоттаах олохтооҕо – Чичигинарова Мария Ивановна 80 сааһын үбүлүөйүн көрсө ыытыллыбыт Уһуйааччы биир кэлим күнэ «Ретро» истиилинэн дьэргэлгэннэ! Бу дьоро күҥҥэ биһиги ытык-мааны бэтэрээннэрбит бочуоттаах ыалдьыттарынан буоллулар. Педагогическай үлэҕэ араас кэмҥэ үлэлээбит педагогтары биир сомоҕоҕо түмэн, уопут атастаһар уонна айар үлэҕэ көҕүлүүр, сүбэлиир-амалыыр, уһуйар сүрүн киһинэн Мария Ивановна буоларын туһунан кэпсэннэ. Бу күн уһуйааммытыгар ытыктабыл, киэн туттуу уонна ис сүрэхтэн үөрүү тоҕо анньан таҕыста. Мария Ивановна үөрэҕирии сайдыытыгар оҥорбут ураты кылаатын, элбэх сыллаах үлэтин, муудараһын уонна педагогтар көлүөнэлэрин ситимин бөҕөргөтүүгэ уһуйааччы оруолун бэлиэтээһин – биһиги тэрилтэбитигэр уһуйааччы үлэтин сайыннарар күүстээх дьайыы буолла. Кини уопута – биһиги оскуола иннинээҕи үөрэҕириибит «көмүс фондатын» төрүтүнэн буолар. Улахан уонна бэлэмнэнии бөлөхтөр иитээччилэрэ оҕолорго уһуйааччы Мария Ивановна туһунан билиини кэҥэтэр кэпсэтиилэри ыыттылар. Кэпсэтии кэмигэр оҕолор кини идэлээх суолун уонна кэнчээри ыччаты иитиигэ киллэрбит кылаатын туһунан элбэҕи биллилэр. Бу кэпсэтиилэр оҕолор өйдөрүгэр-санааларыгар Мария Ивановна үтүө мөссүөнүн хаалларан, кинилэри үөрэххэ-билиигэ тардыстыыга көҕүлээтилэр.