«Ньургуһун» уһуйаан иитээччитэ — Ил Дархан бириэмийэтин лауреата!
«Ньургуһун» уһуйаан иитээччитэ — Ил Дархан бириэмийэтин лауреата! Улууспут үөрэҕин эйгэтигэр өссө биир үөрүүлээх, өрөгөйдөөх сонун тиийэн кэллэ! Хатылытааҕы «Ньургуһун» уһуйаан иитээччитэ Никифорова Ульяна Петровна Саха Өрөспүүбүлүкэтигэр бастыҥ педагог-наставниктарга бэриллэр Ил Дархан бириэмийэтин ылла. Чурапчы улууһун үөрэҕин салалтатын, үөрэх үлэһиттэрин идэлээх сойууһун уонна бүтүн педагогическай общественноһын аатыттан ис сүрэхтэн эҕэрдэбитин тиэрдэбит! Бу үрдүк наҕараада — Ульяна Петровна элбэх сыллаах бэриниилээх, сыралаах үлэтин, кырачаан оҕолору иитиигэ-үөрэтиигэ уонна эдэр педагогтарга бэйэтин дириҥ уопутун үллэстэр сүдү кылаатын өрөспүүбүлүкэ таһымыгар чаҕылхайдык билинии, үрдүктүк сыаналааһын буолар. Убаастабыллаах Ульяна Петровна! Эһиги хас биирдии оҕоҕо сылаас тапталгытын, уйулҕатын уратытын өйдөөн, олох маҥнайгы хардыыларыгар эрэллээх тирэх буолаҕыт. Эһиги уопуккут уонна мындыр сүбэҕит — эдэр педагогтарга күүстээх кынат, сырдык суолдьут буолар.Бу үөрүүлээх күҥҥэр ис сүрэхтэн баҕарабыт кытаанах доруобуйаны, дьиэ кэргэҥҥитигэр дьолу-соргуну уонна куруутун үөрэ-көтө сылдьар кырачааннар тапталларын, төрөппүттэр сылаас сыһыаннарын. Үтүө ааккыт өссө да үрдүү турдун, сыралаах үлэҕит кэскиллээх ситиһиилэринэн үөрдэ турдун!