Он ийи чыл даңзызынче кирбезе-даа, — 12 февраля 2026 г. в 02:19:15.202
Он ийи чыл даңзызынче кирбезе-даа, Ол дег бедик, ол дег хертеш амытан чок, Ол-бо ийже чүктешки дег ажыр октаан, Оң-солагай мөгенинде суксун шыгжаан. Сырый, чараш эстеп хадаан кудуруун-даа, Сынын каастаан каш адыр мыйызын-даа, Сыынга, аътка ачылаткаш амдыгаа дээр, Сывыртажып чадажып каан, күжүр теве. "Сөк-сөк!" - дээрге, күдүк базып ора дүжер, Сөгедектен тептингештиң мунуптар сен. Эрзин, Тестиң, Баян-Колдуң изиг халыын, Элезинниг ховуларын эргээш кээр сен. Кыдыг-кыйыг кадагааты черлер кезип, Кыдат, Моолдуң аразында "торгу оруун", Тывавысче шөйүп кииргеш чиңни үлээн, Тываларның чараш малы, тевевис-тир. Дайын-чаалыг фронтудува кызыл кошту, Дадай чокка сөөртүп алгаш чоруп калган, Аштап-суксап, арып-чудап, хилезе-даа, Аткаар баспаан, шыдамык мал, адан теве. Тос чүзүн малывыстың чоргаар, бедии, Тоң эки – дүгү дүккүр, сүдү сүткүр. Бодаралдыг, ала-чайгаар өзүп-мандыыр, Бодаганныг энгин теве, аалын сактыр. Чонар-дашка чазап каарга сактырга-ла, Чогдур мойнун азып алгаш хола-сарыг, Хараганның тенниг будуун чула тыртып, Харангылап турган ышкаш көстүп келир. Хову черниң "хемелери" диртип чоруур, Ховар-чараш тевелерни көрүксээштиң, Баят, калга, Моолче кирип чоорул, тала. Баян-Колга, Эрзин, Теске көрүп аар сен. Ооржак Аржаан