Ыам ыйын 18 күнүгэр – аан дойдутааҕы музей күнүгэр - В.В. Алексеев аатынан Мүрүтээҕи уо... — 19 мая 2026 г. в 07:05:44.077
Ыам ыйын 18 күнүгэр – аан дойдутааҕы музей күнүгэр - В.В. Алексеев аатынан Мүрүтээҕи уолаттар гимназияларыгар “Уолан” түмэл-эйгэ аһылынна. “Уолан” түмэл-эйгэҕэ 1994-96 сс. психологынан, 1996-2025 сс. дириэктэри үөрэх чааһыгар, үөрэх ис хоһоонугар солбуйааччынан бэриниилээхтик үлэлээбит РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна, Уус Алдан улууһун бочуоттаах олохтооҕо, «Кэскили кытта ситим: уоланнар уонна дьаһалта» бырайыак ааптара, түмэл-эйгэни көҕүлээн тэрийбит уонна салайбыт Рея Васильевна Охлопкова аата иҥэрилиннэ. Бэлиэ тэрээһиҥҥэ “Мүрү нэһилиэгэ” тыа сирин түөлбэтин баһылыга, гимназия 2011 сыллааҕы выпускнига, үрүҥ көмүс медалист П.Ф. Румянцев, үөрэх управлениетын начальнигын солбуйааччы Т.А. Григорьев, улуус култуураҕа управлениетын начальнига Э.М. Киренская, Сэһэн Ардьакыап аатынан улуустааҕы кыраайы, историяны үөрэтэр түмэл дириэктэрэ О.А. Прядезникова, Рея Васильевна балта А.В. Максимова уо.д.а. кыттыыны ыллылар. “Уолан” түмэл-эйгэ аһыллыбыт күнүнэн эҕэрдэ дьүһүйүүнү билигин үөрэнэ сылдьар үс көлүөнэ уоланнар доргуччу аахтылар. Бүгүҥҥү күн икки төгүл бэлиэ: киэн туттар биир дойдулаахпыт революция иннинээҕи саха интеллигенциятын сирдьитэ В.В. Никифоров-Күлүмнүүр төрөөбүтэ 160 сылын туолар өрөгөйдөөх күнүгэр И. Сыроватскай тылыгар, В. Парников дьүрүлүгэр “Сүгүрүй үс саха төрүөҕэ!” ырыаны күргүөмүнэн ыллаатылар. “Уолан” түмэл-эйгэ хоһун аалай кыһыл лиэнтэтин дириэктэр В.В. Рожин, түмэл-эйгэ салайааччыта Н.В. Бурцева, Рея Васильевна балта А.В. Максимова, сиэн быраата 11 кылаас туйгун үөрэнээччитэ, кыһыл көмүс мэтээлгэ кандидат Айаал Сидоров быстылар. “Уолан” түмэл-эйгэ гимназия дьоһун историята, сайдар кэскилэ, көлүөнэ уоланнар түмсэр кииннэрэ буоларыгар эрэнэбит.