Бүгүн от ыйын 12 күнэ-Бөтүрүөп таҥара бэлиэ күнэ. — 12 июля 2026 г. в 07:39:02.986
Бүгүн от ыйын 12 күнэ-Бөтүрүөп таҥара бэлиэ күнэ. "Сир түннүктэрэ" кырдьаҕас дьоммут "От ыйын биир күнэ дьылы аһатар" -диэн мээнэҕэ эппэтэхтэрэ чуолкай. Кинилэр саамай сөптөөх этиилэригэр сөбүлэһэн тыа дьоно самаан сайын былдьаһыктаах кэмин тутуһан күөх быйаҥы сомсорго, көдьүүстээхтик оттуурга бэлэм сылдьаллар. Биһиги көлүөнэ дьон оҕо сааспытыттан саҕалаан, төрөөбүт дэриэбинэбитигэр, олохтоох совхозпутугар окко үлэлээтэхпит, үлэҕэ мускулуннахпыт аҕай. Оччолорго диэххэ, билиҥҥи курдук техника үйэтэ буолбатах. Механизированнай, полумеханизированнай оттуур звенолар аҕыйахтара, үксэ илиинэн оттооһун буолара, аны ардахтаах да күн өрөппөт этилэр, уу отун оҕустаран, мунньааччылар ону тыкаарылыыр этибит. Эрдэ туран-олорон оттуур сирбитигэр сатыы сылдьарбыт. Кумаартан, кырдаайыттан саллыбат этибит, сапсынан эрэ кэбиһэрбит. Эдэр буоламмыт сылааны умнан, оттоон кэлээт киэһэ кулуупка киинэҕэ ойорбут, киинэ кэнниттэн аны волейболлууллара. Бэйэтэ туспа романтика. Охсуллубут от сыта үчүгэйэ, оллоон чэйэ эчи минньигэһэ. "Бука бары-окко!" "Отчут, салаа оту хаалларыма!" "Бары күүһү-окко!" "Биир күн дьылы аһатар" диэн ыҥырыы лозуннар үлэҕэ кынаттыыллара. Ходуһа аайы охсулуннун, күөх от, күрүө ахсын кэчигирээтин кэбиһиилээх от, кыстыгы туоруур оккут баар буоллун! БӨТҮРҮӨП КҮНҮНЭН!