⚜️⚜️⚜️ Ыам ыйын 18 күнүгэр республика бүтүннүүтэ киэн туттар киһибит В.В. Никифоров-Күл... — 18 мая 2026 г. в 13:18:19.547
⚜️⚜️⚜️ Ыам ыйын 18 күнүгэр республика бүтүннүүтэ киэн туттар киһибит В.В. Никифоров-Күлүмнүүр 160 сылын Дүпсүн нэһилиэгэр бэлиэтээтибит. Тэрээһин чэрчитинэн оҕолорго анаан уруһуй күрэҕэ, хоһоон ааҕыытын күрэҕэ, викторина ыытылыннылар. Оҕолор биир дойдулаахтарын туһунан билиилэрин-көрүүлэрин хаҥаттылар. 🔹🔹🔹Бэлиэ күҥҥэ анаммыт үөрүүлээх тэрээһиҥҥэ улуус баһылыгын солбуйааччыта Г. Ф. Аргунов , улуустааҕы кииннэммит библиотека тиһигин директора Л. С. Павлова, улуус управлениетын воспитательнай отдел салайааччыта И. Е. Сивцева кыттыыны ыллылар. Аан бастаан Дүпсүн оскуолатын үөрэнээччилэрин толорууларыгар Рафаэль Баҕатаайыскай «Кырдьык генерала» диэн дириҥ ис хоһоонноох поэматыттан быһа тардыыны иһиттибит. Онтон тыл этээччилэр бары да долгуйан туран, сүҥкэн, улуу киһибит олоҕун туһунан истиҥник-иһирэхтик ахтан аһардылар. Баһылай Никифоров-Күлүмнүүр олорбут дьиэтин иһигэр туттубут мала-сала, сүдү олоҕун туоһулуур матырыйааллар кичэллээхтик ыйаммыттар. ⚜️⚜️⚜️Кини аатын үйэтитэр мемориальнай дуоска арылынна. Бүгүҥҥү күн халлааммыт даҕаны үөрбүттүү, күммүт чаҕылыччы тыкта. Үтүө киһи аата үйэлэргэ өлбөөдүйбэт, кэлэр кэнчээри ыччат өйүгэр-сүрэҕэр өрүү тыыннаах.