МБДОУ "Тюнгюлюнский центр развития ребенка-детский сад "Олимпионик" МР "Мегино-Кангаласский улус (район)"
Лайфстайл · 27 марта 2026 г.
🖋️📗📚Улуу нуучча поэта А.С.Пушкин нэдиэлэтин чэрчитинэн "Пушкины сахалыы саҥардан" ди... — 27 марта 2026 г. в 11:52:27.553
🖋️📗📚Улуу нуучча поэта А.С.Пушкин нэдиэлэтин чэрчитинэн "Пушкины сахалыы саҥардан" диэн тэрээһиммит үрдүк тэрээһиннээхтик, киэҥ хабааннаахтык буолан ааста. Ол курдук нэдиэлэ саҥатыгар Пушкин олоҕор , айар үлэтигэр сыһыаннаах иитээччилэргэ аналлаах викторина буолла, онно элбэх тургутукка сөпкө эппиэттээн иитээччи Толстякова Л.А. кыайыылаах аатын ылла. "Чаҕылыс" 2- ис кыра, орто "Туйгун" бөлөхтөрүгэр олохтоох библиотекаттан библиотекарь Лазарева А. Е. "Кыһыл көмүс балыкчаан" туһунан остуоруйаны остуол театырын нөҥүө кэпсээтэ, кырачааннар болҕомтолорун тарта. Улуу поэт алыптаах остуоруйаларыгар аналлаах уһуйаан оҕолорун төрөппүттэрин кытары уонна "Үрдэл" бэлэмнэнии, "Чаҕылыс" 2- ис кыра иитиллээччилэрэ бөлөҕүнэн оҥорбут илиинэн оҥоһуктарын быыстапката турда, бука бары кыралыын-улаханныын кэрэхсээн көрдүбүт. "Пушкины сахалыы саҥардан"( суруйааччы Дьуон Дьаҥылы этиититтэн) түмүктүүр тэрээһиҥҥэ бэлэмнэнии бөлөҕүн иитиллээччилэрэ Пушкин кэминээҕи вальс музыкатын доҕуһуолугар уйдаран үҥкүүлээтилэр.( муз.салайааччы Федотова С. Н.) Улуу бэйиэти А.С. Пушкины көрүстүлэр, төрөппүт Григорьев Долун Гаврильевич итэҕэтиилээхтик толордо. Кини : Улуу Москва куоракка төрөөбүтүн, кыра эрдэҕиттэн кинигэни олус таптыырын, хоһоон айарын уонна француз тылын ис сүрэҕиттэн сөбүлүүрүн эттэ. Оҕолорго "Руслан уонна Людмила остуоруйатыттан Муора хонноҕор күөх дууп маска"диэн Феоктист Софронов тылбааһыгар быһа тардыыны доргуччу ааҕан иһитиннэрдэ. Инникитин элбэх билиилээх, тыл баайдаах буолуохтарын баҕарда. Улахан "Эрэл" бөлөх ( иитээччилэр Иванова А.А. , Шестакова Я. А.) "Сайдам" бөлөхтөн Новгородова Милена иитээччитинээн Мария Максимовналыын нууччалыы-сахалыы тылларынан "Тииҥчээн баара ол онно ... диэн Салтаан ыраахтааҕы туһунан остуоруйатыттан быһа тардыыны аахтылар. Бастакы суруйааччыларбыт Өкскүлээх Өлөксөйтөн саҕалаан бары Пушкины тылбаастаан Төрүт тылбыт учуутала диэн эппиттэр, билиммиттэр эбит. Араас кэмнээҕи суруйааччылар сахалыы тылбаастаабыт хоһооннорун: сүрүннүүр иитээччи Шестакова С.Ф. "Кыһыҥҥы киэһэ", Сидорова М. И. "Күһүн" Евгений Онегинтан Шестакова Я. А. "Саас кэлиитин" туһунан ааҕан иһитиннэрдилэр. "Өркөн"( иитээччилэр Борисова Н. П., Птицына М. Е.) " Өлбүт сарыабына уонна сэттэ бухатыыр туһунан остуоруйатын", "Үрдэл"( иитээччилэр Олесова В.П.., Пермякова А.М.) "Аҕабыт уонна кини үлэһитин Балда туһунан остуоруйатын" бэлэмнээн оруолларын бэркэ тиэртилэр. Төрөппүттэр кыһанан туран оҕолор көстүүмнэрин тигэн, иитээччилэр дьоҕурдара-талааннара: Вера Прокопьевна аҕабыт оруолун бэркэ биэрэн, Ньургуйаана Павловна остуоруйа геройдарыгар үҥкүү туруоран остуоруйаларын киэргэттэ, көрөөччүнү үөртэ. "Бу ханнык остуоруйаттан" диэн тургутук ыйытыыларга түргэнник хоруйдаан Пономарева Сталина "Өркөн" бөлөх иитиллээччитэ кыайыылаах буолла. Ыытыллыбыт тэрээһиммит оҕолорго нуучча улуу поэтыгар А. С. Пушкиҥҥа тапталы саҕан, кыра эрдэхтэн кинигэҕэ интириэһи тардан, остуоруйаны сэргии улааталларыгар бигэ тирэх, үтүө өйдөбүл буолбута буолуо диэн бүк эрэллээхпит. Сидорова М.И., Оконешникова М.М.