МБОО "Тыарасинская средняя общеобразовательная школа им. М.Н.Турнина" Таттинский улус
Образование · 14 мая 2026 г.
Бүгүн ыам ыйын 14 күнүгэр Таатта-Чурапчы границатыгар П. А. Ойуунускай 1926 сыллаахха т... — 14 мая 2026 г. в 12:39:30.665
Бүгүн ыам ыйын 14 күнүгэр Таатта-Чурапчы границатыгар П. А. Ойуунускай 1926 сыллаахха тэрийбит бастакы Саха национальнай байыаннай оскуолата 100 сыллаах үбүлүөйдээх дататын бэлиэтии оскуола знамятын копиятын туттарыы буолла. Знамя Саха сирин 34 улууһун сыл устата кэрийиэхтээх. Биһиги иннибитинэ илин эҥэр улуустар Мэҥэ-Хаҥалас, Уус-Алдан, Чурапчы дьоно-сэргэтэ Знамя эстафетатын туппуттара. Сарсын Знамяны Чөркөөх орто оскуолатын коллектива кэлэн үөрүүлээх быһыыга-майгыга тутуохтаах. Чурапчы улууһун делегациятын улуус үөрэх управлениятын сүрүн специалиһа Давыдов Е. Н. салайан илдьэ кэллэ. Тааттаттан улуус үөрэҕин управлениетын салайааччытын солбуйааччыта Тютрина Т. А. уонна улуус бэтэрээннэрин сэбиэтин бэрэссэдээтэлэ Попова М. А. кэллилэр. Ону тэҥэ тэрээһини Тыараһа орто оскуолатын директора Саввинова З. В., иитэр үлэҕэ солбуйааччы Бучугасова В. Р. уонна педагог-оргнизатор Васильева И. А. буолан иилээн-саҕалаан ыыттылар. Нэһилиэк аатыттан Ытык сүбэ салайааччыта Чехордун П. П. тыл эттэ. Манна даҕатан эттэххэ Тааттаттан ЯНВШ (Якутская национальная военная школа) 70-тан тахса киһи үөрэммит. Ол иһигэр Тыараһаттан 10-ча киһи үөрэммиттэрэ биллэр. Бу байыаннай үөрэх кыһатын бүтэрбиттэр офицерскай званияны ылаллара. Ону таһынан үгүс салайар үлэҕэ ананан норуоттарын туһугар көдьүүстээхтик үлэлээбиттэрэ. Биллэн туран ЯНВШ выпускниктара Аҕа дойду сэриитигэр биир бастакынан барбыттара уонна чиэстээхтик ийэ дойдуларын көмүскээн үгүс медальынан, орденынан наҕараадаламмыттара, хомойуох иһин сорохторо сэрии толоонугар сырдык тыыннара быстыбыта. Кинилэр истэригэр саха омук аатын ааттаппыт сахаларатан бастакы "Ворошиловский стрелок" - Табунанов Георгий Тимофеевич, бастакы полковник, военный юрист Жегусов Гаврил Дмитриевич, Саха Штирлица буолбут разведчик, Фрунзе аатынан байыаннай академияны бүтэрбит Андросов Георгий Михайлович уо. д. а бу ЯНВШ выпускниктара Таатта чулуу уолаттара этилэр. Бу история биир чаҕылхай уонна сүдү кэрчигэ. Ким да умнуллубат! Туох да умнуллубат!