Бу курдук төрөөбүт норуотун тыла-өһө сайдарыгар сүдү тапталын, өйүн-санаатын ууран тура...
Бу курдук төрөөбүт норуотун тыла-өһө сайдарыгар сүдү тапталын, өйүн-санаатын ууран туран үлэлээбитэ. Саха национальнай культууратын толору сырдатар Балаҕан кылаас арыйбыта. Бала5ан кылаас соруктарынан, төрөөбүт норуоппут сиэрин-майгытын, кутун – сүрүн, ийэ тылын, төрүт культууратын иҥэрии, саханы сахаалыы иитии буолбута. Варвара Григорьевна үөрэтэр оҕолоругар ис дууһатыттан олус истиҥник сыһыаннаһар этэ. Куруук үтүө тылларынан алгыыр, оҕолору оройдоруттан сыллыыр этэ диэн ахталлар. «Дорообо, алааһым!» диэн Саха норуотун биллэр-көстөр муударай дьонун хорсун санаалара, хоһоонноро тиһиллибит оскуола биир улахан истиэндэтин тэрийбитэ. «Алаас о5олоро» диэн үөрэнээччилэрин чинчийэр үлэлэрин сырдатар, анал илиинэн суруллан тахсар сурунаалы үлэлэппитэ. Оскуола үөрэнээччилэригэр нэдиэлэ аайы Саха норуотун ураты үгэстэрин сырдатар түһүлгэлэри тэрийэн ыытар этэ. “Алаас о5ото” диэн авторскай программаны суруйбута. Бу программа оройуон үөрэҕириитин эйгэтигэр улахан биһирэбили ылан, оскуолаларга киэҥник тарҕаммыта. Кини айан хаалларбыт олук тыллара кэнчээри ыччаты, дьону-сэргэни сиэргэ-майгыга иитэр, өй-санаа кылаата буолан, күн бүгүнүгэр диэри иитэ –үөрэтэ, алгыы-арчылыы тураллар. Програмнай тезистара профессор А.Е. Мординов хайҕабылын ылбыта. Республика5а национальнай оскуола сайдар Концепциятын торумун оҥорсубута. Кини улуус уонна республика төрүт культуура учууталларыгар семинар ыыппыта. 1993 сыллаахха «Роль материнского языка в становлении личности» диэн дакылаатынан Аан дойдутаа5ы «Национальная школа: концепция и технология развития» ЮНЕСКО конференциятыгар кыттыбыта. Манна ийэ тыл омугу омук гына иитэр улахан суолталааҕын итэҕэтиилээхтик быһаарбыта. 2005 сыллаахха, олунньуга Төрөөбүт тыл, сурук-бичик күнүгэр Республиканскай араатардар күрэхтэрин кыайыылааҕа буолбута. «Варвара Григорьевна бэйэтин сахалыы өйө-санаата олох уларыйыытын, суверенитеты кытта тэҥҥэ олук уурсан, сайдан испитэ... Ол түмүгэр «Ситим быстыбатар ханнык», “Саха барахсан” диэн кинигэлэрэ тахсыбыттара. Кини суруйар-бичийэр уопута, кэскиллээх санаалара республика5а тар5анан, киэҥ биһирэбили ылан, 2011 сыллаахха Саха суруйааччыларын, онтон Россия суруйааччыларын союһугар чилиэнинэн киирбитэ. Журналистар союзтарын чилиэнэ этэ», – диэн ахтар коллегата Оконешникова Ирина Гурьевна. Чыаппара сэлиэнньэтигэр «Дьо5ур» о5о лаа5ыра тэриллиитин салайсыбыта. Варвара Григорьевна нэһилиэк олоҕун сүрүн общественнига этэ. VI Саха сирин дьахталларын сэйиэһин делегата, 1977 сыллаахха VIII норуот үөрэҕириитин уонна общественноһын сэйиэһин делегата, Ала5ар нэһилиэгин, Чурапчы улууһун Бочуоттаах гражданина, Саха республикатын үтүөлээх учуутала, Учууталлар учууталлара, « Саха республикатын үөрэҕириитин Бочуоттаах ветерана », Төрүт тыл, Слепцовтар учуутал династияларын түсчүтэ, «Знание» обществоттан «Знак признания заслуг» диэн бэлиэ хаһаайката буолар. Варвара Григорьевна прозаик, публицист, Россия уонна Саха сирин суруйааччыларын союһун чилиэнэ биэс үлэтэ кинигэ буолан бэчээттэнэн тахсыбыттара: “Ситим быстыбатар ханнык» . Бичик 2001с., «Саха барахсан» Сайдам 2006 с., «Нарын−наскыл» Сайдам 2007с., «Суруйааччы Ньукулай Туобалаахап» Анна Слепцовалыын суруйбуттара. Бичик 2008с., «Таайбат таабырыным, тиийбэт чыпчаалым» Сайдам 2009с. Нэһилиэк, улуус, республика үөрэҕин эйгэтигэр бэйэтин дьоһун кылаатын киллэрбит, идэтигэр олоҕун анаабыт биир идэлээхпит, энтузиаст учуутал Ваврвара Григорьевна Слепцова биһиги оскуолабыт историятыгар, өйбүтүгэр-санаабытыгар куруук истиҥник ахтыллыа, киэҥ тутта аата ааттаныллыа.