Оскуола сонуннара
Оскуола сонуннара Тохсунньу 27 күнүгэр Аҕа дойду Улуу сэриитин кэмигэр блокадаламмыт Ленинград куорат өстөөх төгүрүктээһиниттэн толору босхоломмут күнүгэр аналлаах уроктары 5,7,8,9,10 кылаастарга история учуутала Яковлев Василий Яковлевич ыытта.Салгыы хаалбыт 6 уонна 11 кылаастарга кэлэр нэдиэлэҕэ ыытыллыаҕа. Тохсунньу 28 күнүгэр оскуолабыт футболга хамаандата Чурапчыга А.И. Федотов аатынан МФС- га футбол көрүҥүн маастарыстыбатыгар үөрэнэн, дьарыктанан кэллилэр. Тохсунньу 29 күнүгэр Мугудай нэһилиэгэр улуустааҕы комплекснай спартакиада чэрчитинэн баскетболга күрэх ыытылынна. Манна улуус иккис бөлөҕөр киирэр 8 хамаанда кыттыыны ыллылар. Биһиги оскуолабыт уолаттарын хамаандата, күүстээх киирсии кэнниттэн 1 миэстэни ылары ситистилэр, тренер Христофоров А.А. Уолаттарбыт олунньу ыйга ыытыллар баскетбол суперфиналыгар 3 группа кыайыылаахтарын кытта күрэхтэһиэхтэрэ. Уолаттарга ситиһиини баҕарабыт. Онтон тохсунньу 30 күнүгэр баскетболга кыргыттарбыт хамаандалара бараннар бэйэлэрин бөлөхтөрүгэр 5-с миэстэ буоллулар. Тохсунньу 30-31 күннэригэр Уус-Алдан улууһун Кэптэни нэһилиэгэр оскуола оҕолоругар өрөспүүбүлүкэтээҕи “Лөгөй мадьынылара” мас тардыһыытын күрэҕэр 6 уол кыттыыны ыла сылдьаллар, тренер Слепцов В.Н. Бу күрэхтэһиигэ барыта 50 хамаандаттан 457 спортсмен күрэхтэһэллэр. Уолаттарбытыгар ситиһиини баҕарыаҕын. Олунньу ыйга 9 кылаас үөрэнээччилэрэ нуучча тылыгар түмүктүүр кэпсэтэн көрүүнү (собеседование) ааһыахтара. Онно бэлэмнэнии үлэ ыытылла турар. Оҕолорго ситиһиини баҕарыаҕыҥ.