Саамал кымыс утахтаах күн оҕолорун ыһыаҕын кэскилин олохтоотубут. — 26 мая 2026 г. в 01:06:28.564
Саамал кымыс утахтаах күн оҕолорун ыһыаҕын кэскилин олохтоотубут. Сайыҥҥыга аан аһар ыйбытыгар, ыам ыйын 25 күнүгэр Баатаҕай орто оскуолатыгар "Күн оҕолорун ыһыаҕа - 2026" бэрт сэргэхтик, сонуннук уонна аан бастаан ыытылынна. Бу күн сарсыардаттан аламай маҥан күнтэн күүс ыла, күлүмүрдүүр күн сырдыгынан салайтара, самаан сайыны көрсө ыһыах ыһа, алгыс ыла, ыллыы - туойа, оонньуу - көрүлүү муһуннулар Баатаҕай орто оскуолатын үөрэнээччилэрэ, учууталлара, төрөппүттэрэ уонна араас тэрилтэлэртэн кэлбит ыҥырыылаах ыалдьыттар. Үөһээ үрдүк Айыылартан арчы күүһүн иҥэринээри кыралыын - улаханныын ыраастанар - арчыланар алгыска муһуннубут. Бастаан утаа алгыс түһэр сирин түптэ буруотунан кэрэ куоларбыт кэккэлэһэн киирэн ыраастаан - арчылаан аастылар. Ол кэнниттэн сэттэ кыыс уонна 9 уол алгысчыты арыаллаан киирдилэр. Айылҕаттан айдарыылаах алгысчыппыт, 3 уол тапталлаах аҕалара, сахалыы куттаах Василий Афанасьевич Колесов ыһыахха мустубут дьоммутун - сэргэбитин алҕаан, аал уоту күндүүлээн, орто дойду сирин - уотун, отун - маһын, тыынар тыыннааҕын бука барыларын араас куһаҕантан, мэһэйдэртэн араҥаччылаата, үчүгэйи - кэрэни түстээтэ, кэскили олохтоото. Онон алгысчыппыт сиргэ - дойдуга, көтөргө - сүүрэргэ, окко - маска, кинилэр иччилэригэр, дьоҥҥо - сэргэҕэ олус күүскэ сүгүрүйэрин, харыстабыллаахтык сыһыаннаһарын бу алгыстан өйдөөтүбүт, ис дууһабытыттан долгуйан туран сүрэхпитигэр ылынныбыт. Алгыс кэнниттэн үлдьү, алгыстаах хонуубутугар арчыламмыт түһүлгэбитигэр үчүгэйкээн нап - нарын кыргыттар кынталдьыйа хаамсан, кыталык буолан сири - дойдуну симээтилэр. Бу манна барыта отучча кыталык кыргыттар өрө дабайан, нап - нарыннык үҥкүүлээн аастылар. Маны этэн эрдэхтэрэ, кыталык үҥкүүтүн көрбүт киһи бэйэтин дьоллооҕунан ааҕынар диэн. Онон ити кыталыктар үҥкүүлээн ааспыттарыгар дьолломмут дьон быһыытынан, сэмээр испитигэр долгуйан, сэмээр үөрэн ыллыбыт. Кыталыктар көтөн барааттарын кытта, кэннилэриттэн Дьөһөгөй оҕолорун уруйдуу тоһуйдубут, онтон Үрүҥ Тунах ыһыахпыт үрдүк аатыгар алгыстаах алаадьынан айах тутан, бар дьоммутун айхаллаатыбыт, сырдыгы - кэрэни кэрэһэлээтибит. Олоҥхо түһэ буолбут Таастаах Дьааҥыбыт килбэйэр киинигэр Баатаҕай орто оскуолатын "Күн оҕолорун - 2026" ыһыаҕын күнүн уруйдаан айхал тыллара этилиннилэр, салгыы 1 "А" уонна 4 "В" кылаас үөрэнээччилэрэ олоҥхолоон омулуттулар. Бу күн анаммыт күммүт айхала, саха омук саргыта сандаардын диэн Улуустааҕы үөрэх тэрилтэтин иитэр үлэҕэ салалтатын салайааччыта Мария Васильевна Коколова эҕэрдэ тылын тириэртэ уонна биһиги оскуолабыт остолобуойа "Саамай үчүгэй көрдөрүүлээх остолобуой" анал кыайыылааҕа буолбутун туһунан үөрүүлээх сонуну иһитиннэрээт, ас астааччыларбытыгар добун суруктары туттартаата. Салгыы оскуолам үөрэнээччилэрэ үөрдүннэр - көттүннэр, куруутун үчүгэй көрдөрүүлээх, көрсүө - сэмэй, үөрэхтээх, дьоһун дьон, инникигэ эрэллээх үөрэнээччилэр буоллуннар диэн Улуу тунах ыһыаҕынан бэйэтин эҕэрдэтин, алгыһын тириэртэ Баатаҕай орто оскуолатын дириэктэрэ Людмила Николаевна Григорьева. Дьэ, ол кэнниттэн оһуохайдаан ойдубут, эһиэхэйдээн эйээрдибит. Оһуохайы таһаардылар ыһыахпыт сүрүн тэрийээччитэ, элбэх ырыа ааптара, кэрэ куоластаах Парасковья Васильевна Потапова, саха кылааһын 6 "В" үчүгэй үөрэнээччитэ, улууспут бастыҥ хомусчута Колесов Сергей уонна Улуустааҕы үөрэх тэрилтэтин методиһа Мария Васильевна Коколова. Оһуохайы оройуттан тутаммыт түһүлгэбитин иччилээтибит, ыһыахпытын уруйдаатыбыт. Ыһыах күнэ хайаан да сандалы остуоллаах буолар. Онон, хас биирдии кылаас ыраахтан, чугастан кэлбит ыалдьыттары уохтаах кымыһынан, үтэһэлээх этинэн, саламааттаах алаадьынан күндүүлээтилэр. Аны хас биирдии кылаас оҕолоро сандалы остуолларын туһунан кэпсээн - ипсээн, ыллаан - туойан, хас биирдии астарын хайдах астаабыттарын билиһиннэрдилэр. Онон дьүүллүүр сүбэҕэ уустуктардаах тугэннэр буолан аастылар. Тоҕо диэтэххэ хас биирдии кылаас олус кыһанан туран бэлэмнэммиттэр, ас арааһын амсатан дьүүллүүр сүбэни сөхтөрдүлэр. Кылаастарга бука барыларыгар