05.03.2026
05.03.2026 📚📘Бүгүн Дүллүкү орто оскуолатын директора 2025 сыллааҕы иитии- үөрэтии үлэтин отчуоттуур мунньаҕа буолла. Мунньахха кытыннылар: төрөппүттэр, учууталлар, кылаас салайааччылара, улуустааҕы үөрэҕирии салалтатын кадры быһаарыы отделыттан Сардаана Алексеевна Жендринская. 🔹Мунньахха бастакынан директор Тихон Александрович Егоров отчуотун иһиттибит: -Оскуола иитэр- үөрэтэр сыала - оҕо олоххо бэлэмнээх, сайдыылаах, ханна баҕарар, хаһан баҕарар тэҥнээхтэрин кытта тэҥҥэ алтыһар, күрэстэһэр таһымнаах киһи буолан иитиллэн тахсарын ситиһии. Дүллүкү орто оскуолатыгар 36 учуутал уонна 2 педагог атын тэрилтэттэн ананан үлэлииллэр. Ол иһигэр 1-кы категориялаах - 8, үрдүк- 14 учуутал баар. Үөрэҕи билии сыл түмүгүнэн - 100%, хаачыстыба - 35%. 2025 сылга 13 оҕо БКЭ туттарбыта. Наиль Степанов математика эксээмэнигэр -70, биологияны 65 баалга туттаран, билигин АГАТУ-га ситиһиилээхтик үөрэнэ сылдьар. 📚Олимпиадаларга, научнай-практическай конференцияларга үөрэнээччилэрбит көхтөөхтүк кытталлар. 📘Араас предметтэргэ үөрэнээччилэр Бүтүн Россиятааҕы олимпиадаларын ll-с түһүмэҕэр: кыайыылаах - 2, призер - 12; lll-с түһүмэххэ - 1 призер; СВОШ - 1 призер. 📗Научнай- практическай конференцияларга - 14 призер; Спортка республика таһымнаах күрэхтэһиигэ 9 оҕо кытынна, 2 - кыайыылаах, 7- призер. Араас хайысхалаах күрэхтэргэ кыттыбыт оҕолор - 17, ол иһигэр 6 кыайыылаах, 11 призер. Быйыл 9 кылааһы 14 оҕо, 11 кылааһы 8 оҕо үөрэнэн быйыл бүтэрэр. Иитии үлэтэ араас хайысханан, тэрээһиннэринэн барар. Төрөппүтү кытта, кылаас таһынан үлэ, профилактика тиһигин быспакка ыытыллар. Салгыы Тихон Александрович оскуола материальнай базатын, итии аһылык, куттала суох буолууну хааччыйыы, коммунальнай өҥө туһунан кэпсээтэ. Оскуола олоҕор көхтөөх кыттыыны ылар, мэлдьи көмөлөһөр төрөппүттэргэ: Любовь Ильинична,Николай Анатольевич Седалищевтарга, Сардаана Константиновна, Геннадий Николаевич Ксенофонтовтарга, Римма Ивановна, Петр Николаевич Дорофеевтарга, Аркадий Аркадьевич, Александра Николаевна Егоровтарга, Радомир Алексеевич, Айталина Петровна Руфовтарга, Александра Николаевна Томскаяҕа, Яна Октябровнаҕа Борисоваҕа, Аида Владимировна Степановаҕа оскуола салалтатыттан махтал суруктар туттарылыннылар. *Сардаана Алексеевна Жендринская, Дүллүкү оскуолатын куратора* улууспутугар элбэх оскуолаҕа анал идэлээх учуутал тиийбэтин, оттон Дүллүкү оскуолата олохтоох кадрдарынан толору хааччыллан олорорун эттэ. Үлэ-хамнас ситиһиилээхтик барарын, үөрэххэ, олимпиадаларга, спортка көрдөрүү үрдээбитин бэлиэтээтэ. -Хаһыс да сылын абитуриент штабыгар үлэлиибин. Үөрэххэ киирэргэ анал көрүллүбүт миэстэлэри, квоталары аныыллар. "Работа в России " диэн платформа баар.Онно выпускниктар, төрөппүттэр, үлэ көрдөөччүлэр, биэрээччилэр киириэхтэрин сөп. Манна үөрэх тэрилтэлэрэ анал квоталарын угаллар, дуогабар түһэрсэллэр. Биһиги эмиэ вакансиябытын киллэрэбит. Үөһээ Бүлүүттэн оҕолору ыла сатыыбыт. Баҕалаах оҕо суох буоллаҕына, атын улуустартан ылабыт. Үчүгэйдик үөрэнэр оҕоҕо стипендия төлүүбүт. Онон студент икки төгүл стипендиялаах буолуон сөп. Бу порталы киирэн көрүҥ, оҕолоргутугар сүбэлээҥ, - диэтэ Сардаана Алексеевна. Үөрэх чааһыгар директоры солбуйааччы Альберт Вадимович Гаврильев 1-кы кылааска киирээччи оҕолордоох төрөппүттэргэ иһитиннэрии оҥордо. Екатерина Степановна Федорова, иитэр үлэҕэ директоры солбуйааччы, актированнай күннэргэ уонна карантин кэмигэр итии аһылыгынан хааччыллыыга уларыйыылар тустарынан кэпсээтэ. "Оскуола үлэтэ үөрэнээччилэринэн, кинилэр ситиһиилэринэн сыаналанар" диэн этии бүгүҥҥү отчуоттуур мунньахха тоҕоостоох. ✍🏼"Эрчим" медиакиин, Үөһээ Бүлүү, Дүллүкү орто оскуолата https://vk.ru/wall-224562870_282