Билии күнүнэн!🔔🔔🔔
Билии күнүнэн!🔔🔔🔔 Сунтаар улууһун үөрэҕин салалтатын аатыттан күндү үөрэнээччилэри, учууталлары, оскуола бары үлэһиттэрин, үөрэҕирии бэтэрээннэрин, төрөппүттэри балаҕан ыйын 1 күнүнэн - Билии күнүнэн уонна саҥа үөрэх дьыла саҕаламмытынан итиитик-истиҥник эҕэрдэлиибин! Бу биир саамай сырдык, үтүө суолталаах дьоллоох оҕо саас умнуллубат бырааһынньыга буолар. Быйыл төрөөбүт Сунтаарбыт улууһа төрүттэммитэ 225 сылыгар бары нэһилиэктэргэ уопсайа 278 оҕо I кылааска үөрэнэ киирэллэр. Бүгүн оскуолаҕа аан бастаан үктэнэн маҥнайгы кылааска киирэр оҕолорго ураты долгутуулах түгэн. Бастакы чуораан лыҥкынас тыаһынан Билии аартыгынан эрэллээхтик хардыылааҥ, үрдүктэн үрдүк чыпчааллары дабайыҥ. Үөрэнээччилэр-инники кэскиллэрбит үөрэҕи өрө тутан, чулуу үтүө үлэһит буоланнар, төрөөбүт улуустарын сайдыытын түстүөхтэрэ диэн эрэнэбин. Ытыктабыллаах учууталлар! Эһиги талбыт идэҕитигэр бэриниилээх, кыһамньылаах үлэҕит-Сунтаар улууһун үүнэр көлүөнэтэ үгүс билиилээх, дьоһуннаах гражданин, патриот буоларыгар бигэ тирэх буолар. Хас биирдии оҕо үөрэҕэр ураты суолу тобулаҥҥыт кыһамньылаах, сыралаах үлэҕит иһин дириҥ махтал тылларын тиэрдэбин. Баҕарабын саҥа ньымалары, бырайыактары олоххо киллэрэҥҥит кэскиллээх үлэҕит үтүө түмүктэрдээх буоллун, тус олоххутугар кытаанах доруобуйаны, дьолу, дьиэ кэргэҥҥитигэр ил-эйэ эҥэрдэстин! 2026-2027 саҥа үөрэх дьыла барыгытыгар үрдүк ситиһиилэри, үгүс үөрүүнү, үтүө түмүктэри уонна саҥа арыйыылары аҕаллын. Үөрэҕирии салалтатын начальнига Борис Николаевич Васильев.