Сүктер-Шимет Ондар: Немелде өөредилгениң байырлалынга чараш ырыны бараалгадыр мен — 28 апреля 2026 г. в 05:33:59.732
Сүктер-Шимет Ондар: Немелде өөредилгениң байырлалынга чараш ырыны бараалгадыр мен Кызыл хоорайның 9 дугаар гимназияның немелде өөредилгезиниң 30 чыл болган юбилейин таварыштыр өөреникчилер «Тываның аныяктары» солунче чагааларны бижип турар. «Звенящая капель» бөлгүмнүң кежигүнү, 9 «б» класстың өөрникчизи, школаның хөй-ниити ажылдарының активчизи Сүктер-Шимет Ондар: - «Звенящая капель» бөлгүмүнде барып эгелээнден бээр 3 чыл чеде берген мен. Ийи чыл дургузунда хор база ансамбль бөлгумнеринге ырлааш, үш дугаар чылында солист кылдыр ырлап эгеледим. Чоокта чаа соло концертимни эрттирген бис. Репертуарымда ырылар 20 чедип турар. Оларның аразында орус, тыва, итали, англи, мексикан дылдардан тургустунган ырылар бар. Репертуарымны тургузуп алгаш, республиканың янзы-бүрү сценаларынга ырлап турдум. Ол ышкаш республика чергелиг ыры мөөрейинге киришкеш, бирги черниң лауреады шаңналга төлептиг болган мен. Гимназияның немелде өөредилгезинде удуртукчу башкымның адын Светлана Михайловна Монгуш дээр. Ол – Тыва Республиканың уран чүүлүнүң тергиини, «Саяннар» ансамблиниң хоочуну, дирижёр, мергежээн вокал башкызы. Школавыстың немелде өөредилгезиниң юбилейлиг байырлалын таварыштыр хүннүң-не белеткелдер чоруп турар. Бо байырлыг хемчегге база онза-чараш, чаа ырымны белек кылдыр бараалгадыр мен. «Элээди журналист» бөлгүмү