Школаның немелде өөредилгезиниң төөгүзүнден: «Театр» уругларның театр-планетарийин ажыт... — 24 апреля 2026 г. в 05:41:01.768
Школаның немелде өөредилгезиниң төөгүзүнден: «Театр» уругларның театр-планетарийин ажытканы Немелде өөредилге уругларның салым-чаяанын илередиринге, мергежил шилип алырынга ужур-дузалыг. Ооң ажылының шынарының база үре-түңнели башкыларның арга-мергежилинден база чогаадыкчы идепкейинден улуг хамааржыр. Ынчангаш уруглар-биле ажылче профессионал специалистерни хаара тудуп турар. 2003 чылдың февраль 28-те немелде өөредилгезинге «Театр» уругларның театр-планетарийиниң ажыдыышкыны болган. Ооң уран чүүл удуртукчузу кылдыр РСФСР-ниң алдарлыг артизи Сиин-оол Лакпаевич Оюн ажылдап эгелээн. Сиин-оол Лакпаевич Оюн-биле интервьюну «журналистика» бөлгүмүнүң удуртукчузу Раиса Яндара кылган. «Баштай-ла эге класстарга хөй адырлыг театр эртемин башкылап эгелей бээрим билек, салым-чаяанныг уруглар көстүп келген. Цирк бөлгүмү база турду. Алдарлыг цирк артизи В. Оскал-оолдуң бөлүүнге чораан Юрий Хөвеңмей дузалаан. Программа езугаар англи тоолга үндезилээн «Үш хаванак» база «Хадың кыс», «Цветик самосветик», «Доңгада кадык» болгаш өске-даа шиилерни школа сценазынга тургустувус. Ынчаар бичии бөлгүмден «Тос-карак» деп уруглар театры тургустунуп келген» — деп, ол чугаалап турган. 2003 чылда Кызыл хоорайның 9 дугаар гимназиязынга немелде тудуг ажыглалга кирген. Ында 300 олуттуг көрүкчүлер залы, чаа техника-биле дериттинген, дескинип турар сценалыг, кабинеттерлиг, ийи улуг телескоптуг театр-планетарий ажыттынган. Аңаа уруглар немелде билиглерге өөренир. Театр-планетарийниң ажык-дузазының дугайында Сиин- оол Лакпаевич Оюн мынчаар чугаалаан: «Бирээде, физика, математика ышкаш берге эртемнерни программа езугаар театрның аргаларын ажыглап тургаш өөредири. Ийиде, салым-чаяанныг уругларның, ада-иениң, профессионал артистерниң киржилгези-биле шиилерни тургузуп болур. Үште, бо театр-планетарий чүгле школаның эвес, а бо хавак кырында микрорайоннуң театры болур. Мен ынчаар бодаар мен». #допобразование_юбилей Школаның архивинден чуруктар