Немелде өөредилге төвүнүң 30 чылы: «Элээди журналист» бөлгүмүнге салым-чаяанныг уруглар... — 29 апреля 2026 г. в 05:16:24.489
Немелде өөредилге төвүнүң 30 чылы: «Элээди журналист» бөлгүмүнге салым-чаяанныг уруглар хөй турган Кызылдың 9-ку гимназиязының Немелде ѳөредилге төвүнге 2011 чылдан тура ажылдап эгеледим. Аңаа «Элээди журналист» деп уругларның чогаадыкчы каттыжыышкынының удртукчузу болуп, онзагай, хөйге билдингир башкылар коллективиниң бир кезии болуп ажылчын амыдыралымны уламчылап кирипкен мен. Эге баштай бо бөлгүмнүң ажылын Тывада ат-сураглыг журнализивис Раиса Тюлюшевна Яндараа оруун изеп үндүрген деп билип алдым. Дараазында бичии журналистерни база-ла сургалыг журналист, чогаалчы Лидия Херлииевна Иргит башкылап, журналистиканың чажыттарын дамчыдып берип, бижиир ажылга чаңчыктырып турган болду. Ындыг ат-алдарлыг журналистерниң соон уламчылап, ол ажылче шымнып кирери, бир талада, улуг харыысалгалыг болгаш, өске талада, чоргааранчыг-даа болган. Республика чергелиг чараш солунувус «Эне сөзүнге» база узун тѳөгүлүг «Тываның аныяктары» солуннарга ажылдап чораан дуржулгам бо чаа ажылымга дыка улуг дузалыг болганы чугаажок. Ынчалза-даа база-ла бодум оон-моон ооренмишаан, билиглерим бедидип тургаш, ѳөреникчилерим-биле демниг кичээлдеп, журналистиканын эге билиглерин чедирер дээш, оларнын сонуургалын оттурар сорулгалыг ажылдадым. Дөзү: https://vk.com/wall-209500928_8263