Үлегерлиг ада, ёзулуг башкы — 20 апреля 2026 г. в 05:27:32.281
Үлегерлиг ада, ёзулуг башкы Хүлер Минчитович Токаш-оол Кызылдың 9 дугаар гимназиязының немелде өөредилгезинге 2000 чылда ажылдап кирген. Ол ыяштан сиилбиири, чонар-даш, судомоделирование бөлгүмнерин эрттирип турган. Башкының дугайында 2014 чылдың ноябрь 20-де үнген «Тываның аныяктары» солунга «Журналистика» бөлгүмүнүң өөреникчилери Даяна Монгуш база Надя Куулар бижээн. «…Башкы ажылы Элегест сумузунуң, ооң соонда Кызыл-Арыгның школаларынга күш-ажыл болгаш черчение башкызы болуп эгелээн. 2000 чылда Кызыл хоорайже көжүп келгеш, 9 дугаар гимназияга күш-ажыл башкызы болуп, янзы-бүрү бөлгүмнер эрттирип ажылдай берген… …Гимназияның хөй-ниити ажылынга күзелдии-биле киржип чоруур. 2012-2013 өөредилге чылында гимназияның адаларының чөвүлели тургустунган. Ооң ажылын база-ла Хүлер Минчитович уштап-баштаан. Өөредилгези, чуруму шала хирелиг өөреникчилерни шын орукче углап, улуг ажылды кылып турар. Немелде өөредилге төвүнге ажылдап келген үелеринде ийи өөреникчизи Тыва Республиканың Чазак Даргазының Грант шаңналынга төлептиг болган. Хостуг үезинде башкы база-ла анаа олурбас. Уйнуу-биле ус-шевер ажылдар кылыр. Тыва национал хөгжүм херекселдери: игил, бызаанчы, дошпулуур база тыва национал эт-херекселдер: согааш-бала, деспи, тос-карак, аптара чазап, сиилбип кылырынга ынак. Ажылынга амгы үе-шагның аайы- биле технологияларны дилеп, Интернетти калбаа-биле хереглеп, ажыглап чоруур, үе-биле деңге базып олурар башкы…» Школаның архивинден чурук. #ТАархив #допобразование #юбилей