Үтүө киһи аата үйэлэргэ умнуллубат!
Үтүө киһи аата үйэлэргэ умнуллубат! Бүгүн, 2026 сыл алтынньы 9 күнүгэр, Кеша Алексеев аатынан Хаптаҕай орто оскуолатыгар ураты суолталаах, истиҥ-сылаас тэрээһин буолан ааста. Оскуола иһинэн 2022 сылтан үлэлиир бэтэрээн учууталларбыт ааттарын үйэтитэр сыаллаах «Үтүө киһи аата үйэлэргэ умнуллубат» бырайыак чэрчитинэн, оскуолабыт уйулҕатын кэбиниэтигэр Саха Өрөспүүбүлүкэтин үөрэҕириитин туйгуна, педагогическай үлэ ветерана, улууска бастакы школьнай психолог Афанасьева Тамара Дмитриевна аата үйэлээхтик иҥэрилиннэ. Эҕэрдэ тылларын оскуола директора Ирина Владимировна Кычкина, Хаптаҕай нэһилиэгин аҕа баһылыга Иван Прокопьевич Зыков, Мэҥэ Хаҥалас улууһун үөрэҕин салалтатын информационно-методическай отделын сүрүннүүр специалиһа Татьяна Михайловна Дмитриева уонна Тамара Дмитриевна кыра кыыһа Ощепкова Туяра Петровна эттилэр. Тэрээһин чэрчитинэн Саха Өрөспүүбүлүкэтин үөрэҕириитин туйгуна, педагогическай үлэ ветерана Тамара Дмитриевна Афанасьева 80 сааһын туолар үбүлүөйдээх сылыгар анаммыт «Ахтыы ситимэ» диэн ахтыы кинигэтин сүрэхтэниитэ буолла. Бу кинигэни М.Н. Кривошапкина, М.Г. Самсонова, С.А. Кокорева, И.В. Кычкина, И.В. Слепцов хомуйан оҥордулар. Кинигэҕэ Тамара Дмитриевнаны бииргэ үлэлээбит коллегалара, үөрэппит үөрэнээччилэрэ, чугас доҕотторо уонна аймахтара кини туһунан истиҥ-сылаас ахтыыларын суруйбуттара. Бу кинигэ «Ахтыы ситимэ» диэн оскуола иһинэн саҥа проект сериятын саҕалааччы буолар. Бу серия ветеран педагогтар туһунан ахтыы брошюралары таһаарыыны былаанныыр уонна кинилэр үтүө ааттарын, баай оппуттарын кэлэр көлүөнэҕэ тиэрдэри көҕүлүүр. Онон бу бастакы кинигэ Тамара Дмитриевна Афанасьеваҕа ананар. Тамара Дмитриевна олоҕо уонна үлэтэ Тамара Дмитриевна 1946 сыл кулун 20 күнүгэр Булун оройуонун Чекуровка нэһилиэгэр элбэх оҕолоох дьиэ кэргэҥҥэ күн сирин көрбүтэ. Кыра сааһыттан үлэҕэ-хамнаска, билиигэ-көрүүгэ тардыһыылаах, дьоҥҥо көмөлөһөр баҕалаах буолан улааппыта. 1991 сыллаахха үөрэхтээһин эйгэтигэр практическай психология курстарын бүтэрэн, профессиональнай үлэтигэр саҥа хардыыны оҥорбута. 1993 сыллаахтан Тамара Дмитриевна Хаптаҕай орто оскуолатыгар бастакы педагог-психолог быһыытынан үлэлээбитэ. Ол кэмҥэ оскуолаҕа психологическай сулууспа саҥа сайдан эрэр этэ. Тамара Дмитриевна бу саҥа хайысха сайдарыгар бэйэтин билиитин, дьоҕурун, сүрэҕин сылааһын уурбута. Кини оҕо барыта туспа дьылҕалаах, туспа майгылаах, туспа дьоҕурдаах диэн өйдүүрэ. Оҕо санаатын истэр, кинини өйүүр, кыһалҕатын чэпчэтэр, бэйэтигэр эрэнэргэ көмөлөһөр — Тамара Дмитриевна күннээҕи үлэтин сүрүн сыала буолара. Кини үөрэнээччилэргэ эрэ буолбакка, төрөппүттэргэ, учууталларга көмөлөһөн, оскуола уонна дьиэ кэргэн икки ардыларыгар өйдөһүүнү, биир санааны бөҕөргөтөргө элбэх үлэни ыыппыта. Кини үлэтин сүрүн ис хоһооно — киһини өйдөөһүн, оҕону таптааһын, дьоҥҥо үтүөнү оҥоруу. Тэрээһин сүрүн түгэнинэн — Бочуоттаах досканы арыйыы уонна кыһыл лентаны быһыы буолла. Ол курдук, кабинеты үөрүүлээхтик арыйдылар Тамара Дмитриевна кыыһа Ощепкова Туяра Петровна; Оскуолабыт директора Ирина Владимировна Кычкина; Оскуолабыт педагог-психолога Айсана Иннокентьевна. Тамара Дмитриевна оҥорбут үлэтэ, хаалларбыт үтүө аата, сырдык санаата билигин даҕаны биһиги сүрэхпитигэр тыыннаах. Кини олорбут олоҕо, үлэлээбит үлэтэ көлүөнэттэн көлүөнэҕэ уос номоҕо буолан ахтылла туруо. Тамара Дмитриевна Афанасьева сырдык аата үйэлэргэ умнуллубатын! Кини биһиги сүрэхпитигэр өрүү тыыннаах. Кеша Алексеев аатынан Хаптаҕай орто оскуолатын кэлэктиибэ Алтынньы 9 күнэ, 2026 сыл