Алтынньы 15 күнүгэр Миитэрэй Таас аатынан Хорообут орто оскуолатыгар бэрт сэргэх күрэх ...
Алтынньы 15 күнүгэр Миитэрэй Таас аатынан Хорообут орто оскуолатыгар бэрт сэргэх күрэх буолан ааста. 4, 5, 6, 7 кылаас уолаттара бэйэлэрэ хамаанда тэринэн, «Матч скул» диэн ааттаах футбол турнирыгар күөн көрүстүлэр. Күрэхтэһии оскуола успуорт саалыгар ыытыллан, үөрэнээччилэр көхтөрүн өссө төгүл көтөхтө. Кыайыы иһин түөрт күүстээх хамаанда кииристэ: «Манчаары», «ЦСКА», «Дохсун» уонна «Зенит». Хас биирдии оонньуу тыҥааһыннаахтык ааста, уолаттар кыайыыга дьулуурдарын, түмсүүлээхтэрин уонна успуорка бэриниилээхтэрин көрдөрдүлэр. Күрэхтэһии түмүгэ маннык буолла: 1 миэстэ — «Манчаары» хамаанда (командир — 7 кылаас үөрэнээччитэ Сорокоумов Артём); 2 миэстэ — «ЦСКА» хамаанда (командир — 8 кылаас үөрэнээччитэ Сергучев Арчын); 3 миэстэ — «Дохсун» хамаанда (командир — 6 кылаас үөрэнээччитэ Плотников Одун); 4 миэстэ — «Зенит» хамаанда (командир — 7 кылаас үөрэнээччитэ Ноговицын Андрей). Кыайыылаахтары сэргэ «Кэскиллээх кыттыы иһин» анал ааты «Зенит» хамаанда ылла. Ордук үчүгэйдик бэйэлэрин көрдөрбүт уолаттар: Плотников Одун, Сорокоумов Артём, Ноговицын Андрей уонна Сергучев Арчын. Кинилэр оонньуу хаамыытыгар үрдүк маастарыстыбаны, түргэн толкуйу уонна түмсүүлээх үлэни көрдөрдүлэр. Хамандыырдарын кытта тэҥҥэ Пинигин Аркадий уонна Игнатьев Артем эмиэ бэркэ вратарьдаатылар. Кинилэр кыһамньылаахтык дьарыктаналларын, футбол успуордугар бэриниилээхтэрин итэҕэттилэр. Күрэхтэһии биир долгутуулаах түгэнинэн ШСК "Дохсун" салайааччыта Николай Петрович Андреев кыайыылаахтары эҕэрдэлээн туран, барыларыгар бэйэтин аатыттан минньигэс бэлэхтэри уунна. Уолаттарбытыгар өссө үрдүк кыайыылары, үөрэхтэригэр ситиһиилэри баҕарабыт!