Бүгүн улууспут оскуолаларыгар "Тиһэх чуораан" күнүнэн үөрэнээччилэри, төрөппүттэри уонн... — 26 мая 2026 г. в 10:01:58.116
Бүгүн улууспут оскуолаларыгар "Тиһэх чуораан" күнүнэн үөрэнээччилэри, төрөппүттэри уонна оскуола үлэһиттэрин «Чурапчы улууһа» муниципальнай оройуон салалтатын аатыттан эҕэрдэлээтибит. Быйылгы үөрэх дьылыгар улууспут үрдүнэн барыта 21 оскуолаҕа 3879 оҕо үөрэннэ. Олортон 9 кылааһы – 403, 11 кылааһы – 256 оҕо бүтэрдэ. Улуус үрдүнэн кыһыл уонна үрүҥ көмүс мэтээлгэ 21 оҕо үлэлэһэр. Үөрэх эйгэтигэр Россия үрдүнэн оскуола иннинээҕи үөрэхтээһин сыла биллэриллибитэ. Улууспут уһуйааннара таһаарыылаах үлэлэринэн инники күөҥҥэ сылдьаллар. Улууспутугар 16 уһуйаан, 13 оскуола иһинээҕи бөлөх, уопсайа 87 бөлөҕүнэн 1519 иитиллээччини хабан үлэлиир. «Туллукчаан» уһуйаан «Саха Өрөспүүбүлүкэтин бастыҥ тыа сирин уһуйаана» аатын ылла. Чурапчы нэһилиэгэр «Кыталык» уһуйаан 75 миэстэлээх таас дьиэтин тутуута салҕанар. «Дьиэ кэргэн» национальнай проегынан Мындаҕаайы нэһилиэгин «Ымыы» уһуйааныгар капитальнай өрөмүөн ыытыллыаҕа. Сыл устата оҕолорбут бүтүн Россиятааҕы олимпиадаларга, «Эдэр профессионаллар» эрэгийиэннээҕи күрэхтэригэр, «Саха сирин спортсмен оҕолоро» республикатааҕы спартакиадаҕа үрдүк ситиһиилээхтик уонна республикатааҕы «Инникигэ хардыы» научнай кэмпириэнсийэҕэ 4-с төгүлүн Чурапчы улууһун хамаандата бастыыры ситиспитинэн, онтон да атын күрэхтэргэ улууспут аатын чиэстээхтик көмүскээн кэлбиттэринэн киэн туттабыт уонна махтанабыт. Оскуолабыт үөрэнээччилэрин ортотугар улуустааҕы, республикатааҕы, бүтүн Россиятааҕы уонна Аан дойдутааҕы спортивнай күрэхтэр, научнай-практическай конференциялар, олимпиадалар, айар талааннар күрэхтэрин призердара, лауреаттара баалларынан киэн туттабыт. Төрдүс сылын ыытыллар "Ытык дьоммут хорсун быһыылара - үйэлэргэ өйдөбүл" патриотическай бырайыак чэрчитинэн улууспут оскуолаларын 19 үөрэнээччитэ, 2 салайааччы буолан Дьокуускай-Москва-Новгород-Старая Русса-Санкт Петербург-Москва-Дьокуускай хайысханан Албан аат суолунан айаннаан кэлбиттэрэ. Ыам ыйын 5 күнүттэн саҕалаан Чурапчы улууһун оскуолаларыгар Дьокуускайдааҕы национальнай байыаннай оскуола Знамятын көрсөр үөрүүлээх линейкалар ыытыллыбыттара. Үөрэнээччилэр VI-с төгүлүн ыытыллыбыт «БАСХАН-2026» дьыалабыай өрөспүүбүлүкэтээҕи оонньууга, спорт араас көрүҥнэригэр, «Спортивные Якутяне» зачетугар киирэр Хотугу многоборьеҕа, өрөспүүбүлүкэ мас тардыһыытыгар бас күрэҕэр, ырыа, үҥкүү, айар талаан, онтон да атын күрэхтэһиилэригэр дойдубут, өрөспүүбүлүкэбит уонна улууспут чиэстэрин ситиһиилээхтик көмүскээбиттэринэн киэн туттабыт уонна махтанабыт. Бу "Тиһэх чуораан" бырааһынньыгын хас биирдии оҕоҕо умнуллубат, долгутуулаах бэлиэ түгэнигэр үтүө баҕа санааларбытын, алгыстаах тылбытын анааммыт, оҕолорго элбэх кыаҕы, киэҥ аартыгы арыйар судаарыстыбаннай эксээмэннэри туттарыыларыгар уонна идэни ылан, олоххо бэйэ миэстэтин булуналларыгар ситиһиилэри баҕардыбыт. Выпускниктарбыт бары учууталларыгар махталлаах үөрэнээччилэрин истиҥ сыһыана, итии таптала хаһан да сөбэҕүрээбэтин диэн баҕа санаабыт бастыҥын тиэртибит.