Бүгүн Чурапчы улууһа тэриллибит кэрэ-бэлиэ күнэ. — 25 марта 2026 г. в 02:50:00.790
Бүгүн Чурапчы улууһа тэриллибит кэрэ-бэлиэ күнэ. Кулун тутар 25 күнүгэр 1930 с. Боотуруускай улуус Чурапчы оройуона диэн буолбута. Онтон ыла олох, үлэ аартыгынан улууспутугар балысхан сайдыы барда, инникигэ дьоһун суол тэлилиннэ. Аҕа дойдубут олорон кэлбит устуоруйатын тахсыылаах-түһүүлээх кэмнэрин тэҥҥэ үллэстэн, улууспут үгүс көлүөнэ дьоно үтүө суобастаахтык айан-тутан хаалларбыт ситиһиилэринэн, Чурапчыны албан аатырдыбыт биир дойдулаахтарбытынан киэн туттуохпутун туттабыт. Бу күн хас биирдиибит өйө-санаата, дьулуһар баҕата, ыллыктаах ырата биир – тапталлаах төрөөбүт түөлбэбит үүнэ, чэчирии, сайда, муҥутуу турдун диэн. Чурапчы улууһа былыр былыргыттан өрөспүүбүлүкэ устуоруйатыгар дьоһун суолу-ииһи хаалларбыт үтүөлээх, үлэһит бастыҥа дьоннордоох, тыа хаһаайыстыбатынан ситиһиилээхтик дьарыктанар, инники кэккэҕэ сылдьар биир бөдөҥ улууһа. Биһиги улууспут үлэни кыайа-хото тутарынан, хайдахтаах да ыарахаттартан чаҕыйбат туруу үлэһит дьоннооҕунан өлөн-охтон биэрбэт кэрэ кэскиллээх, инникигэ күүстээх дьулуурдаах. Үүнэр сүһүөх ыччаппыт үйэлэргэ мунньуллубут үгэстэри кичэллээхтик харыстыыр, байытар, саҥалыы сайыннарар. Барыгытыгар улуус сайдыытыгар киллэрбит сыралаах үлэҕит, төрөөбүт сиргитигэр уҕараабат улуу тапталгыт иһин улахан махталбын тиэрдэбин. Барыбытын сомоҕолуур, биир өйгө-санааҕа түмэр, биир тыынныыр ураты суолталаах күҥҥэ тапталлаах Чурапчыбыт улууһугар сайдыыны, бары олохтоохторугар кытаанах доруобуйаны, этэҥҥэ буолууну баҕарабын!