26 май көнне, тантаналы да, моңсу да булган "Соңгы кыңгырау" бәйрәме Түбән Чыршылы мәдә... — 27 мая 2026 г. в 10:41:02.111
26 май көнне, тантаналы да, моңсу да булган "Соңгы кыңгырау" бәйрәме Түбән Чыршылы мәдәният йортында узды. Бәйрәмчә бизәлгән сәхнәдә биш бөртек чыгарылышның 9 сыйныф укучылары басып тора. Дәүләтебез гимннарын тыңлаудан башланып киткән тантана ахырына кадәр бер сулышта барды. Мәктәп директоры Гөлия Камил кызы уку елында яхшы нәтиҗәләр күрсәткән укучыларга дипломнар тапшырды, 9 сыйныф укучыларына теләкләр әйтте. Авыл башлыгы Нурия Яхиевна һәр бәйрәмнең кунагы, ул да укучыларга ак юллар теләде. Авыл мәчете исеменнән килгән мөслимәбез Фәния апа да изге дога, киңәш - нәсыйхәтләр аша укучыларга уңышлар юллады. Ветеран укытучы Энҗе Шамил кызы да теләкләрен җиткерде. Укытучыларга карата рәхмәт сүзләре, матур теләләр дә күп булды. Әти- әниләр җыр аша матур теләкләр әйтте, ясле- бакча хезмәткәрләренә, укытучыларга рәхмәт сүзләре ирештерде. Традиция буенча 2018 елгы чыгарылыш сыйныф укучылары язган хатны Вафина Гөлнара укыды. Хатның эчтәлекге гаҗәпкә калдырса, шуңа өстәп төшерелгән видеоязма да хатирәләрне яңартты. 9 сыйныф укучылары үзләренең беренчедә укыган вакытларын, апа- абыйларга әйткән теләкләрен күреп гаҗәпкә калдылар. Әлбәттә традиция дәвам итә - беренче сыйныф укучыларына хат язылды. Башлангычның 3-4 сыйныф укучылары да теләкләр белән чыгыш ясады. Алар үзләренең дустын - Насыбуллин Әмирне урта сыйныфка озата. Сыйныф җитәкчесе Гүзәлия Әхәт кызы укучысына уңышлар теләде. Кадерле 9 сыйныф укучылары!Сезне бәйрәм белән котлыйбыз. Имтиханнарны уңышлы тапшырып, үзегез теләгән уку йортларын сайларга, укырга язсын. Юлларыгыз имин, тормышыгыз матур, сәламәтлегегез ныклы булсын. Бәйрәмне оештырган укучыларга, әти- әниләргә, укытучыларга, клуб хезмәткәрләренә зур рәхмәт.