Олунньу 26 күнүгэр М.Н. Анисимов аатынан Сиэйэ орто оскуолатын ОБиЗР уонна труд предмет...
Олунньу 26 күнүгэр М.Н. Анисимов аатынан Сиэйэ орто оскуолатын ОБиЗР уонна труд предметтэрин учуутала, Арассыыйа Федерациятын үөрэҕириитин бочуоттаах үлэһитэ, Саха Өрөспүүбүлүкэтин үөрэҕириитин туйгуна, Арассыыйа худуоһунньуктарын сойууһун чилиэнэ, Саха Өрөспүүбүлүкэтин уус-уран оҥоһуктар маастара, Сунтаар улууһун норуотун маастара, Сиэйэ нэһилиэгин бочуоттаах олохтооҕо Максим Максимович Данилов авторскай семинара буолан ааста. Өрөспүүбүлүкэҕэ ыытыллыбыт "Зарница 2.0." военно-патриотическай оонньууга ситиһиилээхтик кыттыбыт, өр сыллаах сыралаах үлэтин баай уопутуттан үллэһиннэ. Улуус оскуолаларыттан барыта 14 ОБиЗР учууталлара кэлэн кыттыыны ыллылар. Семинар бастакы чааһыгар Максим Максимович күрэхтэргэ кыттыы хаачыстыбатын үрдэтиигэ ханнык ньымалары туттарын, бэйэтин үгүс сыллаах ситиһиилээх үлэтин билиһиннэрдэ, онтон иккис чааһыгар "ВДВ" байыаннай кулууб үөрэнээччилэрин көмөтүнэн элбэх практическай үөрүйэхтэри көрдөрдүлэр. Семинар түмүк чааһыгар ОБиЗР учууталларын икки ардыларыгар үс түһүмэхтээх "Компетентный учитель" күрэх буолла. Сыал ытыы, автоматы ыһыы-хомуйуу, ботуруону ииттиннии көрүҥнэргэ күөн көрүстүлэр. Сүрдээх тыҥааһыннаах киирсии түмүгэр, Тойбохой оскуолатын ОБиЗрга учуутала Могусов Айсен Анатольевич кыайыылааҕынан таҕыста. Максим Максимович таайа, биһиги оскуолабыт бэтэрээн учуутала, Саха Өрөспүүбүлүкэтин үтүөлээх учуутала, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин спордун сайыннарыыга бэлиэ хаһаайына Илларионов Парфений Никитич оҕолоро, сиэннэрэ туруорбут 10.000 солк. бириэмийэлэринэн кыайыылаах наҕараадаланна. Кыттааччылар тэрээһин үрдүк таһымын, бэриллибит матырыйааллар практическай сыаннастарын бэлиэтээтилэр уонна Сиэйэ оскуолатын кэллэктиибэр, махталларын биллэрдилэр.