📚 Бүгүн С.С. Васильев-Борогонскай аатынан киин бибилэтиэкэ ааҕар саалатыгар бибилэтиэк... — 4 марта 2026 г. в 22:34:14.263
📚 Бүгүн С.С. Васильев-Борогонскай аатынан киин бибилэтиэкэ ааҕар саалатыгар бибилэтиэкэ иһинэн Оҕо төрөөбүт тылынан ааҕыытын көҕүлүүр киин үлэтин чэрчитинэн Мүрү нэһилиэгин оскуолаларын, уһуйааннарын төрөппүттэригэр сахалыы ааҕыыны көҕүлүүр тэрээһин буолла. Манна барыта 30-тан тахса төрөппүт кытынна. Кыттааччылар бибилэтиэкэ салааларын көрдүлэр-иһиттилэр. Тэрээһини кииннэммит бибилэтиэкэ тиһигин дириэктэрэ Лена Павлова иилээн-саҕалаан ыытта, кини быйыл саҥа тэриллибит киин үлэтин торумун, туох үлэ ыытыллыбытын билиһиннэрдэ. Оҕо бибилэтиэкэтин сэбиэдиссэйэ Вера Портнягина ааҕыы оҕо сайдарыгар суолтатын, куйаар ситимигэр уонна кумааҕы кинигэни ааҕыы уратытын быһаарда. Оҕону угуйар хайдах курдук үчүгэй сахалыы кинигэлэр баалларын холобурдаан көрдөрдө. Салгыы оҕо бибилэтиэкэтин сүрүнннүүр бибилэтиэкэрдэрэ сэһэргээтилэр. Биир интэриэһи Мүрүтээҕи уолаттар гимназияларын саха тылын учуутала Наталья Бурцева тарта. Кини республика саха тылын учууталларын кытта оҥорбут «Саха уран суругун эйгэтигэр умсулҕаннаах айан» ойуулаах энциклопедиятын билиһиннэрдэ. Түмүккэ санаа атастаһыытыгар өссө төрөппүтү, оҕону түмэр маннык суолталаах тэрээһиннэр буола туралларыгар баҕардылар. Онон хас биирдии төрөппүт оҕотун ааҕыыга сыһыарар, бибилэтиэкэ сырдык аанын үгүстүк арыйарга санаа иҥэриммитэ саарбаҕа суох. Мария Аргунова ⬇️