🔶📖 «Идэҕэ хайысхалааһын - 2026» чэрчитинэн Жатай техникумун кытары көрсүһүү тэрилиннэ — 6 марта 2026 г. в 01:08:14.154
🔶📖 «Идэҕэ хайысхалааһын - 2026» чэрчитинэн Жатай техникумун кытары көрсүһүү тэрилиннэ Кулун тутар 5 күнүгэр А.П. Павлов аатынан Сунтаар 1 нүөмэрдээх оскуолатыгар суолталаах тэрээһин буолан ааста. Ол курдук Жатайдааҕы техникум салалтата, преподавателлэрэ уонна устудьуоннара Сунтаарга кэлэн, оскуола салайааччыларын, учууталларын, төрөппүттэрин уонна 8-10 кылаас үөрэнээччилэрин кытары көрүстүлэр. 🔸 Тэрээһин сыала соруга – ыччакка идэни таластыырга көмө, техникум үөрэҕин усулуобуйатын уонна кыахтарын билиһиннэрии буолла. Үлэ төгүрүк остуолтан саҕаланна. Манна дириэктэрдэр, үлэһиттэр уонна төрөппүттэр түмсүүлэрэ кытыннылар. Ол кэннэ оскуола актовай саалатыгар чопчу ирдэбиллэри билиһиннэрэр маастар-кылаастар тэрилиннилэр. Үөрэнээччилэр судовождение, робототехника уонна мехатроника, медицинскэй сиэстирэ, ас астааһын хайсхаларынан үлэлээн, идэ тиһигин билистилэр, бэйэлэрин холонон көрдүлэр. 🔸 Тэрээһин Жатайдааҕы техникум үлэһиттэрин уонна устудьуоннарын бэлэмнээбит кэнсиэрдэринэн түмүктэннэ. Тэрээһин кыттыылаахтара маннык көрсүһүү үрдүк суолтатын бэлиэтээтилэр. Бу курдук Жатай техникума билиҥҥи тиэхиньикэ туһунан билиини, уопуттаах преподавателлэри уонна интэриэһинэй идэлэри түмэн, ыччакка арыйан көрдөрдө. 🔸 Оскуола үөрэнээччилэрэ уонна учууталлара Жатайдааҕы техникум ыалдьыттарыгар ис сүрэхтэриттэн махталларын биллэрдилэр уонна кэлэр сылларга бииргэ үлэлээһиҥҥэ баҕа санааларын тиэртилэр. Бу көрсүһүү оскуолаларын бүтэрээри сылдьар оҕолорго практическай көмө буолуоҕа диэн эрэли үөскэттэ. Кэлбит дьон бары тэрээһинтэн элбэх саҥа билиини-көрүүнү ылан, үтүө санаанан тарҕастылар. Сунтаар улууһун үөрэҕин салалтата бүгүҥҥү тэрээһин тэриллэн ааспытыгар Сунтаар 1-кы нүөмэрдээх оскуолатыгар уонна Жатайдааҕы техникум дириэктэригэр Владимир Тихоновка, кэллэктиибигэр махталын биллэрэр. Үөрэнээччилэргэ, төрөппүттэргэ уонна учууталларга барыларыгар билиҥҥи кэм ирдэбилинэн маннык көрсүһүүлэргэ өссө даҕаны көхтөөхтүк кытта тураргытын баҕарабыт.