🔶 А.П. Павлов аатынан Сунтаар 1 нүөмэрдээх оскуолатыгар "Дни СВФУ-2026" саҕаланна — 26 февраля 2026 г. в 12:04:15.936
🔶 А.П. Павлов аатынан Сунтаар 1 нүөмэрдээх оскуолатыгар "Дни СВФУ-2026" саҕаланна Олунньу 26 күнүгэр киэҥ профориентационнай бырайыак Сунтаарга үлэтин саҕалаата. Улуус дьаһалтатын өйөбүлүнэн үөрэх салалтатын иитии уонна эбии үөрэхтээһин салаата тэрийбит тэрээһинигэр үөрэнээччилэр, педагогтар уонна төрөппүттэр кыттыыны ыллылар. Улууспутугар үс күннээх бырагырааммаллаах М.К. Аммосов аатынан Хотугулуу-Илиҥҥи федеральнай университет 13 киһилээх дэлэгээссийэтэ - инженернай-техническэй, финансовай-экономическай, естественнай наукалар уонна педагогическай институт тутаах препопадаветэллэрэ кэллилэр. 🔸 Тэрээһин үөрүүлээх аһыллыыта устудьуон олоҕун сырдатар видеоролик көрдөрүүтүнэн саҕаланна. Үөрэх салалтатын салайааччыта Борис Васильев эҕэрдэ тылыгар ыалдьыттарга махталын биллэрэн, улуус сайдыытыгар идэни талыы суолтатын тоһоҕолоон бэлиэтээтэ. Инженернай-техническэй институт дириэктэрэ, техническай наука кандидата Е.А. Архангельская инженерияҕа үөрэтии тутаах хайысхаларын уонна аныгы ньымаларын туһунан кэпсээтэ, оттон киин приемнай комиссия салайааччыта Е.А. Ильина 2026 приемнай хампаанньа үлэтигэр сиһилии тохтоото. 🔸 Долгутуулаах түгэнинэн ХИФУ салалтатын аатыттан махтал суруктары туттарыы сиэрэ-туома ыытылынна. Университет преподавателлэрэ Сунтаар улууһун устудьуоннарын төрөппүттэригэр истиҥ махталларын биллэрдилэр. Үөрүүлээх быһыыга-майгыга үрдүк үөрэх кыһатыгар ситиһиилээхтик үөрэнэр, үрдүк академическай түмүктэри уонна олоххо көхтөөх позицияны көрдөрөр оҕолоох ыаллар бэлиэтэннилэр. Университет бэрэстэбиитэллэрэ төрөппүттэр кыыһамньылара, муударай толкуйдара устудьуоннар инники ситиһиилэрин, кыайыыларын акылаатын ууралларын тоһоҕолоон бэлиэтээтилэр. 🔸 Пленарнай чаас кэнниттэн тэрээһин интерактивнай формата ыытылынна. Үөрэнээччилэргэ профориентационнай былаһааккалар тэрилиннилэр. Оҕолор ИТИ маастар-кылаастарыгар сырыттылар. Ол курдук Т.А. Козлов инженернай дьарыгы ыытта, А.А. Дарамаева черчение уонна технология учууталларыгар маастар-кылаас ыытта. Маны тэҥэ, үрдүкү кылаас үөрэнээччилэрэ БКЭ бэлэмнэниигэ биирдиилээн консультацияҕа сырыттылар. ВУЗ преподавателлэрэ химия, обществознание, математика уонна физика уустук боппуруостарын ырыттылар. 🔸 Күн түмүгэр ХИФУ ФЭИ уонна 1-кы нүөмэрдээх оскуола икки ардыларыгар сөбүлэҥ түһэристилэр. Илии баттааһынынан оскуола базатыгар социальнай-экономическай кылаас аһыллыыта бэлиэтэннэ. Маннык кылаас арыллыыта үөрэнээччилэргэ профильнай предметтэргэ бэлэмнэниини дириҥэтэн, үөрэххэ киирэллэригэр туһалыа диэн эрэнэбит. Бастакы күн олус таһаарыылаахтык ааспытын кыттааччылар бэлиэтээтилэр. Сарсын Сунтаардааҕы политехническэй лиссиэйгэ уонна өйүүн Элгээйи оскуолатыгар ХИФУ күннэрин үлэтэ салганар.