🔸🔶🔸 Улууспут учууталлара функциональнай грамотностька үлэлэрин көрдөрдүлэр: киэҥ дал... — 29 января 2026 г. в 10:52:27.968
🔸🔶🔸 Улууспут учууталлара функциональнай грамотностька үлэлэрин көрдөрдүлэр: киэҥ далааһыннаах педагогическай бэстибээл Тохсунньу 29 күнүгэр А.П. Павлов аатынан Сунтаар 1 нүөмэрдээх оскуолатыгар «Образование будущего сегодня” диэн бастыҥ педагогическай практикалар I улуустааҕы бэстибээллэрэ ситиһиилээхтик түмүктэннэ. 🔸 Тэрээһин бастыҥ уопуту атастаһыыга уонна үөрэтиигэ саҥа ньымалары көрдөрүүгэ дьоһуннаах былаһаакка буолла. Сүрүн сыалынан саҥардыллыбыт ФГОС ирдэбиллэригэр эппиэттиир көдьүүстээх педагогическай практиканы арыйыы уонна тарҕатыы буолла. 🔸 Манна бүтүн улуус оскуолаларыттан 70-тан тахса педагог икки сүрүн формакка бэйэлэрин үлэлэрин билиһиннэрдилэр: “Учимся для жизни” аһаҕас уруоктар: күн устата 27 уруок ыытылынна. Манна ааҕар-суоттуур, математическай, естественнай үөрэхтээһин грамотноһын үөскэтиигэ соруктары күннээҕи үөрэх процеһыгар хайдах киллэрэн туһаныахха сөбүн көрдүлэр. “Аҥардас предмети эрэ үөрэппэккэ, олоххо үөрэтэбит, - дииллэр кыттааччылар. – Холобур, математика өрөмүөннээһиҥҥэ хайдах көмөлөһөрүн, оттон ааҕыы – түргэн сөптөөх быһаарыныыны ылынарга, бу биһиги сүрүн сорукпут буолар.” 🔸 «Научу за 20 минут». Манна педагогтар бэйэ-бэйэлэрин кытта маастарыстыба кистэлэҥнэрин үллэһиннилэр. Үөрэнээччилэри хайдах интэриэһиргэтэбит? Уруокка ойуулугу хайдах оҥоруохха сөбүй? Матырыйааллары бэлэмнииргэ оҥоһуу өй хайдах туһаныллыай? 20 мүнүүтэ иһигэр учууталлар биир идэлээхтэригэр уопуттарын, сатабылларын көрдөрдүлэр. Тэтимнээх практическай үлэ кэнниттэн учууталлар «Функциональная грамотность: от идеи к действию» стратегическай сессияҕа кытыннылар. Манна кыттааччылар араас боппуруостарга дьүүллэстилэр, үөрэнээччилэр түргэнник уларыйар эйгэҕэ бэйэлэригэр эрэллээх буолалларын туһугар тугу оҥоруохха сөбүн ырытыстылар. 🔸 Күн түмүгэр функциональнай грамотностька сорудахтар хомуурунньуктарын сүрэхтэниитэ буолла. Манна алын, орто уонна үрдүкү кылаастарга сорудахтар киирдилэр – барыта биһиги бэйэбит учууталларбыт илиилэринэн түмүллүбүт хомуурунньуктар буолаллар. Бу матырыйааллары улуус оскуолаларыгар уруоктарга туһаныллыахтара. Бу курдук бэстибээлгэ кэлбит хас биирдии киһи саҥа идеялары, билиилэри, көҕүлээһиннэри илдьэ барда. Тэрийээччилэр кыттааччыларга, экспертэргэ махталларын биллэрэллэр.