Күндү Сахабыт сирин бар дьоно! — 22 апреля 2026 г. в 22:42:27.101
Күндү Сахабыт сирин бар дьоно! Муус устар 27 күнэ - Саха Өрөспүүбүлүкэтин күнэ! Сахабыт сирин төрөөбүт күнүгэр аналлаах ˝«Барахов уонна мин" диэн бырайыак чэрчитинэн »«Сахабыт омугун уһулуччулаах чулуу уолун Исидор Никифорович Бараховы умнубаппыт, тумнубаппыт, сүгүрүйэбит!" диэн үтүө тэрээһиҥҥэ барыгытын ыҥырабыт. Буолар күнэ: муус устар ый 26 күнэ, өрөбүл күн. Бириэмэтэ: 14ч.-17ч. дылы Буолар сирэ: Дьокуускай куоракка Өксөкүлээх Өлөксөй аатынан Норуоттар доҕордоһууларын дьиэтэ, Гостинай саала, 2 этээс, уҥа хайысха. Аадырыһа: Пояркова, 4. Тэрийээччилэр: Уопсастыбаннай түмсүүлэр: "Саха эйгэтэ", "Кэрэ олох", "Хотун Бүлүү". Бу күн бары түмсэммит биир сырдык эйгэҕэ киирэммит* Айыы алгыһынан араҥаччыланыахпыт, тапталлаах Сахабыт сирин төрөөбүт күнүнэн ырыанан- тойугунан эҕэрдэлиэхпит, алыптаах хомуһунан айхаллыахпыт, үҥкүүнэн, оһуохайынан уруйдуохпут уонна Сахабыт Өрөспүүбүлүкэтин төрүттэспит улуу дьоммутун ахтыахпыт, чулуу уолбут Исидор Барахов туһунан кэпсэтиэхпит, кини аатын биир үөлээннээхтэрин курдук үрдүктүк, киэҥник үйэтитэр гына аймахтарын кытта санаабытын түмүөхпүт. Бу күн кыттыыны ылыахтара ыҥырыылаах ыалдьыттар, Исидор Барахов сырдык аатын үйэтитиигэ үлэлэһэр үтүө дьоннорбут. Улуу дьоммутугар улуустаһан бүтэммит сахабыт омугун саргытын салайсыбыт дьоммутун барыларын тэҥҥэ тумус тутан кинилэр албан ааттарын ыччакка, кэлэр көлүөнэҕэ чиҥник сүрэхтэригэр иҥэрэн истэхпитинэ эрэ сахаларынан киэҥ туттан төрөөбүт дойдуларыгар тапталлара үрдүү туруоҕа, саха буолан сандааран, киһи буолан килбэйэн сахабыт омуга үйэттэн үйэҕэ уруйа- айхала өрөгөйдөөн иһиэҕэ, өбүгэбит хаанын салҕаан кинилэртэн ситимнэрин тутаннар алгыстаах аартыктара арыллан дьоллоро тосхойо туруоҕа. Сахабыт сирин өрөспүүбүлүкэтин тэрийсибит, сайыннарбыт, саҥа кэрдиис сырдык кэмҥэ таһаарбыт, сахабыт омугун өлөр өлүүттэн быыһаабыт уһулуччулаах киһибит Исидор Барахов албан аатын үйэтитиигэ күүс- көмө буолуоххайыҥ. Киириитэ босхо. Үтүө бар дьоммут, биллэриини киэҥник тарҕатыһан элбэх киһиэхэ тириэрдэргэ күүс- көмө буолуҥ диэн ыҥырабыт, махтанабыт. Тэрийэр бөлөх.