“Тыа сирин оскуолата: аныгы кэм көрүүлэрэ” сүбэ мунньах
“Тыа сирин оскуолата: аныгы кэм көрүүлэрэ” сүбэ мунньах 2026 сыл муус устар 11 күнүгэр биһиги оскуолабытыгар тыа сиригэр үөрэх тэрилтэлэрин сайдыытыгар аныгы кэм көрүүлэрин анаарар, Бүлүү улууһун үөрэҕин тэрилтэлэрин холобуругар уопут атастаһар, кэскиллээх хайысхалары туһулуур сыаллаах “Тыа сирин оскуолата: аныгы кэм көрүүлэрэ” сүбэ мунньах буолан ааста. Тэрээһиҥҥэ Бүлүү улууһун үөрэҕирии эйгэтин тэрилтэлэрин үлэһиттэрэ, салайааччылара, үөрэх салалтатын үлэһиттэрэ, уопсайа 70-ча үлэһит кыттыыны ылла. Мунньаҕы СӨ Билим Акадьыамыйатын иһинэн үлэлиир Төрөөбүт тыллары үөрэтэр, харыстыыр уонна сайыннарар киин салайааччыта, педагогика билимин дуоктара, профессор, академик Феодосия Васильевна Габышева уонна педагогика билимин хандьыдаата, Төрөөбүт тыллары үөрэтэр, харыстыыр уонна сайыннарар киин сүрүнннүр научнай үлэһитэ Надежда Николаевна Васильева билиҥҥи кэмҥэ олус суолталаах кэпсэтиини төгүрүк остуол тула ыыттылар Оскуола дириэктэрэ Нахов Георгий Иннокентьевич, “Тааһаҕар нэһилиэгэ” МТ аҕа баһылыга Каратаев Семен Самуилович кэлбит ыалдьыттары эҕэрдэлээтилэр, мунньах хаамыытын билиһиннэрдилэр. Улуустааҕы үөрэх салалтатын начальнигын солбуйааччы Филиппова Наталья Алексеевна “Тыа сирин оскуолатын бүгүӈӈүтэ уонна сарсыӈӈыта” иһитиннэриитигэр тыа сирин оскуолатын тыын боппуруостарыгар тохтоон ааста. Ол курдук, аччыгый кэмпилиэктээх оскуолалар кыһалҕаларыгар, кадрдары бэлэмнээһин, инфраструктураны тупсарыы, оҕону сахалыы эйгэҕэ иитии, 2026 сыл Бүлүү улууһун үөрэҕириитин эйгэтигэр Ааҕыы сылын тосхоллоругар тохтоон ааста. Бүүлүү улууһун баһылыгын социальнай политикаҕа солбуйааччыта Комаров Александр Игоревич улууска оскуола уонна уопсастыбаннас тиһиктээхтик үлэлиэхтээҕин, тыа сиригэр айылҕа харыстабылыгар, саха төрүт үгэһин сайыннарыыга үлэ күүскэ барыахтааҕын бэлиэтээн эттэ. Төрөөбүт тыллары үөрэтэр, харыстыыр уонна сайыннарар киин салайааччыта Феодосия Васильевна Габышева төрөөбүт төрүт тылбытын сайыннарар, итиэннэ тылы сүтэрбэккэ, харыстаан илдьэ сылдьан кэлэр көлүөнэҕэ чөл хаалларар, тириэрдэр туһунан киэҥ анаарыылаах кэпсэтиилэр өрөспүүбүлүкэ таһымыгар эрэ буолбакка, дойду үрдүнэн сытыытык турарын, тыа сирин оскуолата каадырдары сүтэримиэн наадатын бэлиэтээн эттэ. Маны таһынан, салгыы үлэ былаанын билиһиннэрдэ. Киин сүрүннүүр научнай үлэһитэ Надежда Николаевна Васильева оҕону кыра эрдэҕиттэн төрөөбүт тылынан иитии, үөрэтии эйгэтин тэрийии суолталаах боппуруостарыгар тохтоон ааста. Е.А. Степанова аатынан Тоҕус орто оскуолатын директора Тимофеева Маайыска Григорьевна тыа оскуолатын сайдыытын бүгүҥҥүтүн салайар оскуолатын холобуругар сырдатта. “Учууталлар учууталлара”, М.А. Алексеев аатынан Баппаҕаайы орто оскуолатын алын сүһүөх учуутала Жиркова Ирина Николаевна тыа сиригэр оскуола сайдарыгар нэһилиэк бигэ туруктааҕа, дьон-сэргэ төрүт үгэскэ чугас буолуута бары өттүнэн үтүөнэн дьайыан сөбүн бэлиэтээтэ. Тааһаҕар нэһилиэгин “Мичээр” оҕо уһуйаанын иитээччитэ Лилия Руслановна Ксенофонтова, Тааһаҕар оскуолатын учууталлара Ольга Самуиловна Каратаева, Мария Гаврильевна Попова оҕону сахалыы эйгэҕэ иитии, тыа, куорат оскуолалаларыгар саха тылын үөрэтии боппуруостарыгар этиилэрэ боротокуолга киирдэ. Бүгүҥҥү сүбэ мунньах кыттыылаахтара инники турар сыаллары-соруктары, сокуоҥҥа тахсар уларыйыылары, төрөөбүт тыл учууталларын чааһа, кинилэр үлэлиир усулуобуйаларын тэрийии, о.д.а боппуруостары ырыттылар. 2030 с. дылы ылыныллыбыт “СӨ саха тылын, литэрэтиирэтин, култууратын үөрэтии кэнсиэпсийэтэ” олоххо киириитин сүрүн тосхоллорун дьүүллэстилэр, тыа оскуолалара дойду үрдүнэн буола турар уларыйыыларга хайдах көмүскэнэн, тэринэн үлэлиэххэ сөбүн торумнаатылар.