Алын сүһүөх учууталларын улуустааҕы методическай сэминээрдэрэ буолла
Алын сүһүөх учууталларын улуустааҕы методическай сэминээрдэрэ буолла Олунньу 26 күнүгэр Н.Н.Каратаев аатынан Тааһаҕар орто оскуолатыгар алын сүһүөх учууталларын улуустааҕы методическай сэминээрдэрэ буолла. Сэминээр учуобунньуктар ааптардара, Аҕа дойду Улуу сэриитин кыттыылааҕа, педагогическай үлэ бэтэрээнэ, Саха АССР оскуолаларын үтүөлээх учуутала, РСФСР норуотун үөрэҕириитин туйгуна, педагогика билимнэрин кандидата, Н.К. Крупская уонна С.А. Новгородов аатынан бириэмийэлэр лауреаттара, биһиги нэһилиэкпититтэн төрүттээх Игнатий Иванович Каратаев 103 сылыгар, Бүлүү улууһун үөрэҕириитин эйгэтигэр Ааҕыы сылыгар ананан ыытылынна. Бөкчөҥөө, Чочу, Халбаакы, Бороҕон, Тоҕус, Бүлүү № 2 оскуолаларыттан барыта 24 учуутал кыттыыны ыллылар. Кэлбит учууталлар оскуола музейын кэрэхсээн көрдүлэр. И.И.Каратаевка анаммыт Герой паартатын арыллыытыгар сырыттылар. Паартаҕа 4 кылаас бастыҥ үөрэнээччитэ Айсаана Иванова олорор чиэскэ тигистэ. Ол кэннэ учууталлар өр сыллаах уопуттарыттан дакылааттары аахтылар, саха тылын, ааҕыытын уруоктарыгар туттар аныгылыы матырыйаалларын көрдөрдүлэр, баай уопуттарыттан үллэһиннилэр. Сэминээр 2-с чааһыгар саха тылын уонна ааҕыытын үөрэтиигэ аналлаах “Төгүрүк остуолга“ санаа атастаһыыта буолла, резолюция ылылынна. Тааһаҕар оскуолатын саха тылын, литературатын учуутала Каратаева О.С. ыалдьыттарга кэрэхсэбиллээх оонньууну ыытта. Сэминээргэ кэлбит ыалдьыттар тэрийбит оскуола кэллэктиибигэр махтаннылар, баҕа санааларын эттилэр.